Domen vart forkynt for tiltalte i Trøndelag tingrett måndag føremiddag.
Ein samrøystes rett dømer tiltalte til 15 års fengsel for drap og drapsforsøk.
Retten meiner tiltalte forgifta kona med morfin og forsøkte å forgifte henne mot hennar vilje, opplyste tingrettsdomar Eirik Lereim under gjennomgangen av domen.
May Irene Eliassen (73) døydde 29. juni i Ørland kommune. I kroppen hennar vart det funne ei stor overdose med morfin.
Støtta seg til vitnemål frå son
Retten meiner det er fleire moment som taler for at May Iren Eliassen ikkje ønska å døy, og at ho derfor ikkje tok tablettane sjølv:
- Då kvinna låg på sjukehuset i februar og det vart oppdaga morfin i kroppen hennar, sa ho til sonen at ho ikkje hadde tatt tablettane.
- Tiltalte fortalde til dei han ville kjøpe morfinen frå at stoffet var til ein kamerat som ønska å døy.
- Då tiltalte vart pågripen undra han seg over kva som hadde skjedd med kona og nekta for at han kjende til morfinen.
- Eit vitne sa i retten at tiltalte hadde sagt at han meinte sønene til avdøde kunne ha gitt henne morfinen.
Mister arveretten
Retten har ikkje funne noko motiv for kvifor tiltalte drap kona.
Domar Lereim seier dette ikkje var eit overlagt drap, men at tiltalte kan ha gjort dette av medkjensle for kona som hadde fått diagnosen.
Men dette er ikkje snakk om eit barmhjertigheitsdrap, påpeika Lereim.
Retten meiner tiltalte starta å planlegge forgiftinga i byrjinga av januar 2023, då kona reiste på rehabilitering.
– May Irene var ikkje nær ved å døy, sa domar Lereim.
Han viste til sakkunnige som meinte at fornærma kunne ha levd i mellom fem og ti år til med sjukdomen.
Tiltalte er også frådømd retten til å arve kona.
Tiltalte: – Ville ikkje vete når kona tok tablettane
Han har erklært seg skuldig i å ha medverka til sjølvdrap ved å ha kjøpt tablettane.
Men han nektar for å ha drepe henne. Han har forklart at det var kona som ønska å døy etter å ha fått diagnosen Parkinson pluss i 2022.
Han kjøpte tablettane etter avtale med kona og gav dei til henne.
– Eg sa til henne at eg ikkje ville vete når ho tok tablettane, sa han i rettssaka.
Tiltalte sa ingenting om at kona hadde vore innlagd med morfinforgifting i februar då han ringde AMK like før klokka 22 den 29. juni.
I februar overlevde ho, men låg på sjukehuset i fleire dagar før ho fekk kome heim igjen.
Derfor vart mannen også tiltalt for drapsforsøk.
Anka på staden
Retten dømer tiltalte (68) til 15 års fengsel, to år mindre enn påstanden frå aktor.
– Tiltalte var jo budd på det verste, men å førebu seg på noko slikt kan jo ingen. Det seier forsvarer Kristina Jørgensen til NRK etter at domen er forkynt.
Tiltalte meiner han ikkje har drepe kona og anka domen på staden.
Dermed ligg det an til ein ny runde i Frostating lagmannsrett.
Det finst ikkje noko bevis for at det var tiltalte som forgifta kona og ikkje ho sjølv som tok tablettane.
Derfor har det vore ført mange vitne som har fortalt om sitt inntrykk av både tiltalte og kona hans.
Påtalemakta har presentert ein rekke indisier som dei meiner underbyggjer drapsteorien.
– Det har vore utfordrande både i etterforskninga og her i retten.
– Vi måtte få fram heile biletet og samanlikne dei ulike bevisa, seier aktor, førstestatsadvoktat Unni Sandøy, til NRK måndag.
Dei to sønene til avdøde var også til stades i rettsmøtet måndag då domen vart kjend.
–Dei er veldig letta over domen. Saka har vore ekstremt belastande for dei, seier bistandsadvokat Vibeke Meland.
Sønene har heile tida meint at mora deira ikkje ønska å døy og at det var snakk om eit drap.