Onsdag vedtok Det internasjonale Skiforbundet (FIS) programmet for ski-VM i Trondheim 2025.
Det inneheld ei ny øving i kombinert for kvinner og ein paraøving i sprint langrenn.
– Mange har jobba målretta i lang tid for å få desse nye øvingane i VM i Trondheim. Dette bidreg til at meisterskapen blir det mest innhaldsrike og spennande nokon gong i VM, seier skipresident, Tove Moe Dyrhaug, i ei pressemelding.
Illustrasjon av korleis det nye hoppanlegget i Granåsen i Trondheim vil sjå ut under VM i 2025.
Foto: TRONDHEIM 2025Same distansar for kvinner og menn
På styremøtet i Zürich bestemde FIS at distansane skal vere dei same for kvinner og menn også i verdsmeisterskap.
Det betyr at VM-distansane i langrenn blir som følgjer:
- 10 kilometer, 20 kilometer og 50 kilometer
- fellesstart med skibyte 10 + 10 kilometer
- stafettar over 4 x 7,5 kilometer, sprint og lagsprint
– Viktige steg i inkludering og likestilling
Sportssjef Kristin Mürer Stemland seier ho er strålande fornøgd med at dei har fått gjennomslag for alle ønska sine for programmet.
– Det blir eit svært innhaldsrikt program, som vil by publikum på mange fantastiske idrettsaugneblinkar. Det blir også eit krevjande og spennande program for utøvarane, seier ho.
– Når vi i tillegg får inn para i programmet og like premiepengar for kvinner og menn, tek vi viktige steg både når det gjeld inkludering og likestilling.
