Den framande arten truar naturen og andre naturlege fiskeartar.
– Derfor er det fint å sjå at så mange pukkellaksar blir stoppa.
Det seier klima- og miljøminister Andreas Bjelland Eriksen i ei pressemelding.
– Tanaelva er ei av dei viktigaste lakseelvane i verda, og det er derfor avgjerande at den atlantiske villaksen slepp forbi. Både fagfolk og frivillige gjer ein kjempeinnsats, og dei held fram det gode arbeidet i august.
Målet er å bevare den atlantiske laksen
– No blir det for fullt jobba i elvane for å bevare den atlantiske laksen.
Det seier fungerande miljødirektør Tone Lise Alstad Eid.
– Måndag denne veka såg vi ein markant auke i talet på fanga pukkellaksar med 9.609, og den førebelse toppen så langt kom tysdag med 11.563 pukkellaksar fanga.
Pukkellaksen kan utgjere ein trussel mot atlanterhavslaksen ved å konkurrera om ressursar og kanskje også overføra sjukdommar.
Foto: Tove Jensen / NRKSett opp mot tala frå 2023 er denne auken forventa, ifølge miljødirektøren.
– Det er ei glede å sjå at 950 atlantiske laksar vart sleppte opp berre i Tanaelva denne veka. For å bevare den atlantiske laksen må pukkellaksen nedkjempast i elvane og samtidig er det viktig å sørgje for at den atlantiske laksen og andre lokale artar kjem seg forbi fella.
24.850 pukkellaksar er tekne ut i Tanaelva så langt i år.
Veterinærinstituttet driftar fella i Tanaelva på oppdrag frå Miljødirektoratet, og får hjelp av Norsk institutt for naturforsking (NINA), Mohn Technology og det finske naturressursinstituttet, Luke.
Saman driv dei ei omfattande overvaking av villaksen i området ovanfor og nedanfor fella ved Seida i Tana.
Overvakinga gir viktig informasjon for å vurdere behov for ekstra tiltak for å sleppe forbi villaks, som står nedanfor fella.
Følg fangsten frå dag til dag
Det er hovudsakleg ved bruk av fiskefeller at dei totalt 94.475 pukkellaksane har blitt fanga i elvane.
Mesteparten av pukkellaksen blir fanga i Finnmark.
Statsforvaltaren i Troms og Finnmark oppdaterer jamleg nettsida si med nyheiter om pukkellaksfangsten i omtrent 60 andre elvar som dei har ansvaret for.
Ved førre pukkellaksinvasjon i 2023 registrerte NINA nesten 580.000 pukkellaksar i norske elvar og kystområde.
Av desse kom 97 prosent til Finnmark.
Rundt 250 000 pukkellaksar vart fanga i 2023. NINA gjennomførte desse berekningane i 2023 på oppdrag frå Miljødirektoratet, og vil gjere det same i etterkant av pukkellakssesongen i år.
