Ukjent norsk volleyballpar slo brasilianske OL-favorittar: – Heilt uverkeleg

– Han er ein levande legende og har alltid vore Christians store førebilete. Det er jo sinnsjukt kult berre å helse på han, ler Morten Kvamsdal.

Han snakkar om Ricardo Santos, olympisk meister frå Athen og ein av verdas beste sandvolleyballspelar i mange år.

I går blei han og hans nye makker Allison slått av eit heilt nytt norsk sandvolleypar.

Større enn Norge-Brasil

Og kanskje enda større, Morten Kvamsdal og Christian Sørum slo også Pedro og Evandro som er ranka som nummer to i verda i verdsserieturneringa i Fortaleza i Brasil.

– Det var ein skikkeleg skrell. Dei var veldig kompisar før kampen, men ikkje så veldig etterpå. Eg trur ikkje dei hadde sett for seg å tape mot oss, humrar Kvamsdal.

Tidlegare OL-deltakar i sandvolleyball, Vegard Høidalen, rangerer prestasjonen høgare enn da Noreg slo Brasil i 1998.

– Begge prestasjonane er sjølvsagt store, men eg meiner Sørum/Kvamsdals prestasjon er enda større. Nordmenn forstår ikkje kor sterkt det er. Eg er spesielt imponert over Christian Sørum som berre er 20 år, seier Høidalen.

Pedro/Evandro er eitt av dei to para Brasil satsar alt på i Rio-OL og har eit vanvittig press på seg frå volleyball-elskande Brasil 97 dagar før leikane. Billettane til volleyball og sandvolleyball var dei som blei fortast utseld.

Eit lite håp om OL-plass

Etter dei to sensasjonssigrane i gruppespelet skal det norske paret spele sin fyrste kvartfinale i ei verdsserieturnering seinare i dag.

– Me er jo underdogs og Mexico har spelt bra tidlegare i år. Men nå har me slått det beste laget i turneringa så det bør jo vere mogleg å slå dei andre også. Det er ingen det er umogleg å slå nå.

Dei to kom rett frå turnering i Kina til Fortaleza.

– Det såg ikkje bra ut på trening, me hadde ei døgnrytme som ikkje likna grisen etter 11 timars forskjell frå Kina. Det er heilt uverkeleg at det har gått så bra.

OL-plass blir derimot ein del vanskelegare for duoen å sikre. Sidan dei berre har seks turneringar saman kan dei ikkje kvalifisere seg blant dei 16 best ranka laga.

– Me er eigentleg berre eit prøveprosjekt, og har berre spelt saman eit halvt år, fortel 26-åringen frå Eidfjord.

Likevel har dei ein liten sjanse gjennom den europeiske kvalifiseringa i Stavanger seinare i sommar. Der kan eitt europeisk lag kvalifisere seg og Noreg kan stille med to lag.

Men verken Horrem/Eithun eller Hordvik/Husken har heilt gjeve opp OL-tur og vil også kjempe om å få delta i Stavanger.

– Det gjev så klart inspirasjon og slå lag som er medaljekandidatar i OL. Me har ikkje gjeve opp Rio. Det er jo ingen andre plassar i verda sandvolleyball er så stort som der.