Trass i at det har vore ein vanskeleg sesong for Bjørn Einar Romøren, er han sikker på at han har det som skal til for å gjere suksess under VM. Han har stor tru på seg sjølv, og seier han gjer ting på trening som bør kvalifisere til ein plass blant dei fire som skal forsvare Noregs ære i hoppbakken.
- Nå må eg gjere jobben på trening for å vise at eg kan hevde meg i renn. På fredag viste eg ting som skulle vere meir enn godt nok til å bli teken ut på laget. Men det er vel fire andre også som har tenkt å gjere det godt, seier Bjørn Einar Romøren til NRK.
– Er outsidar og ikkje reserve
Bjørn Einar Romøren seier han ikkje reiser til VM som reserve. Han er i angrepsposisjon, seier han. Og denne posisjonen skal han bruke, ikkje berre til å kome med på laget, men også til å hevde seg heilt i toppen under renna under VM.
– Eg ser ikkje på meg sjølv som ein reserve. Eg ser på meg som ein outsidar. Eg har ikkje falle i den grøfta det ville vere å tru at eg sjølv er dårleg. Fire fekk klarsignal før rennet i Vikersund. Eg har stor tru på at potensialet mitt er høgt. Med den hoppinga eg klarer å få til, bør eg vere med i renn.
– Gler meg til presset kjem
Bjørn Einar Romøren har ikkje mista trua på seg sjølv, sjølv om han har levert dårlege hopp på rekke og rad.
– Eg er outsidar i heile samanhengen. Eg har framleis trua på at eg er ein god skihoppar, som ikkje har klart å få det ut til no i sesongen. Eg har lave skuldrar. Eg veit at presset kjem. Og eg gledar meg til presset kjem. Eg gler meg til kjensla av å ha heimepublikum med meg, og å få vere med på noko stort, seier Romøren.
– VM-forma er på veg
Den siste tida har Bjørn Einar Romøren hatt ei positiv utvikling. Men den positive utviklinga har kome fram først og fremst på treningane. Han er sikker på at det løsnar når laget kjem opp i Holmenkollen.
– Forma er stigande. Eg er veldig fornøgd med samlinga vi hadde i forrige veke. Eg reiser til Holmenkollen med ei veldig positiv haldning til det som skal skje.
– Vil kose meg og kline til
Romøren held fast på den positive tankegangen. Han kunne nok ha late negative haldningar få rom og plass. Mend et ville verken tene han sjølv eller nokon andre når alvoret slår inn under VM.
– Eg kunne sikkert ha frykta at det skulle bli vanskeleg under VM. Men eg vel å sjå på det slik eg har sett heile sesongen. Topphoppa har vore inne, men dei har kome alt for sjeldan. Eg vonar eg klarer å setje på autopiloten er VM er der. Då vil eg gjerne kose meg, kline til og oppleve folkefesten, seier han.
– Men tenkjer du ikkje på at det verkeleg kan bli vanskeleg under VM?
– Eg ofrar ikkje så mykje tankar på at VM også skal gå dårleg. I hopp kan alt skje veldig fort. Eg har ikkje vore så stabil i år. Men klarer eg å gjere noko av det eg gjer på trening, er eg plutseleg med og lagar moro for dei som er i bakken, seier Bjørn Einar Romøren.
