Familien Weng har nemleg gjort tiltak spesielt for Heidi – langrennsstjerna til familien.
Heidi Weng er over snittet opptatt av smittevern. Ho sørger alltid for å halde nødvendig avstand, bruker munnbind meir enn andre og held oppe hygienen.
Men Weng er også svært familiekjær, med eit særleg svakt punkt for dei yngre medlemmene til familien. Derfor blei nevøen hennar, barnet til søstera Merete, tatt ut av barnehagen midtvegs i desember.
– Han er ein liten sjarmør, men eg har ikkje fått vore så mykje inne hos dei i det siste. Det har berre vore å gå opp på verandaen og prate gjennom vindauget, fortel Weng og fortset:
– Besteforeldra på begge sider er pensjonistar, så dei tar ansvar med å hjelpe til i desember. Det er fint for meg, for da kan eg vere saman med familien heile jula.
TAR GREP: Heidi Weng saman med mora May Bente, bestemor til nevøen.
Foto: NTB– Det skjer ikkje igjen
Barnehagar kan vere ei smittebombe, og småbarnsforeldre landet rundt har erfaring med at sjukdom blir dratt med heim. Det er dette Weng også er klar over, men det er ikkje alltid så lett å dy seg.
Under sesongopninga på Beitostølen blei Weng observert med nevøen i armane like etter rennet. Sjølv om ho er klar over at smittefaren aukar.
– Jo da, eg tenker på det. Men eg har ikkje hjarte til å ikkje vere med tanteungen, seier ho og fortel at det blei ein aketur med nevøen rett etter rennet på Lillehammer.
– Det blei restitusjonsøkta mi.
Weng har også tre tantebarn gjennom familien til sambuaren.
– Det er utruleg hyggeleg å vere tante. Eg har på ein måte fire maskotar, smiler ho.
Familien er viktig og det same gjeld julehøgtida. Etter nokre mindre hyggelege opplevingar i jula dei siste åra, er ho nå lykkeleg for at familien legg til rette for at ho kan vere saman med dei.
– Eg er takksam for det. Eg var aleine i jula i fjor, og har vore det éin gong før. Da hadde eg diaré før Tour de Ski og eg blei isolert frå dei andre. Det var siste gong i fjor, at eg var i høgda i jula. Det skjer ikkje igjen.
– Ekstremt
NRKs langrennsekspert fortel at det er ein kjent sak at Weng går lenger enn dei fleste med tanke på smittevern.
EKSPERT: Fredrik Aukland.
Foto: Håvard Greger Hagen / NRK– Akkurat på dette området er nok Heidi ekstrem. Mange gjer grep med nærmaste familie og kjærast. Men her snakkar ein om tantebarn og foreldre. Dette er meir omfattande. Det er ganske ekstremt, seier han.
Aukland meiner det er riktig av Weng å gjere tiltaka ho meiner gjør henne best forberedt, både fysisk og mentalt. Men hyller samtidig familien som er med på reisa.
– For mange hadde det kanskje vore utenkeleg. Men det viser jo berre at hele familien er involvert i å gjere henne optimalt forberedt. Det er ikkje sikkert det ville vore riktig for andre, men det er det for henne. De rundt henne strekker seg langt for å sørge for at alt ligg til rette for ein optimal VM-sesong, seier eksperten.
Ladar opp til Tour de Ski
Etter verdscuphelga på Lillehammer vedgjekk Heidi Weng at ho var utlada. Ein heftig sesongstart hadde tatt på, og 33-åringen valde å stå over i Davos.
– Eg håpar å få litt overskot igjen, for eg er rett og slett litt sliten, seier Weng.
Ho stod over renn for å prioritere trening fram mot Tour de Ski – og ikkje minst få til ei skikkeleg julefeiring.
Under førre Tour de Ski gjekk ho seg opp på pallen på sisteetappen – den berykta monsterbakken. Weng har to samanlagtsigrar frå Tour de Ski tidlegare i karrieren.
Tour de Ski startar 28. desember. Hør touren på NRK Radio.
