Halvparten har installert nytt varslingsanlegg

– Det synest eg er bra. Nokon vil vente til det gamle anlegget sluttar å verke, seier byantikvar Jorunn Monrad i Kristiansand kommune.

I 2010 fekk huseigarane støtte til å sette inn eit anlegg som varsla brann direkte til ein bemanna stasjon.

No finst det ikkje lengre reservedelar, og anlegget må skiftast ut. I desember sluttar det gamle systemet å verke.

– Dette er ikkje eit krav, berre røykvarslarar er påbodne i kvar etasje, fortel Monrad.

Mange verneverdige

Posebyen har over 500 bygningar. Rundt 350 av dei er verneverdige.

Den gamle bydelen består av små, kvite trehus som står tett.

Difor blir Posebyen rekna som eit av dei best bevarte trehusmiljøa i Europa.

– Nokre av bygningane er frå 1600–1700-talet, forklarer Monrad.

– Det er særs viktig å ha fungerande brannvarslingsanlegg når ein bur i tett trehusbusetnad, seier leiar av førebyggande avdeling i Kristiansandsregionen brann og redning, Hans Arne Madsen.

Kristiansand har hatt fire store bybrannar sidan byen blei grunnlagd.

Den første var i 1734. I 1859 kom Østerbrannen i Kristian IVs gate. Tre kvartal og delar av to til brann ned.

Mange hus langs elva gjekk tapt. I nyare tid har det også vore brannar, blant anna i Holbergs gate i 2015.

Får økonomisk hjelp

Kommunen gir no tilskot til nye varslingsanlegg.

Då blir prisen for huseigarane rundt 300 kroner i månaden. I 2010 kosta eit slikt anlegg rundt 13 000 kroner.

– Det er særs viktig å ha fungerande brannvarslingsanlegg når ein bur i tett trehusbusetnad. Desse områda er slik at brann lett kan spreie seg vidare frå bygg til bygg og kan fort forårsake store øydeleggingar, seier Monrad.

Onsdag 15. oktober er det kalla inn til informasjonsmøte i rådhuset i Kristiansand.

Då vil mellom andre Monrad vere til stades for å informere meir om alarmane.

I tillegg kan folk stille spørsmål.

– Brannvesenet skulle ønske at alarmen var kopla direkte til oss og ikkje til eit alarmselskap, som kan forseinke utrykking, seier Madsen i brannvesenet i Kristiansand.