Får plass i Kunstsilo: «Ein av våre største»

– Ho var ei veldig moderne, aktiv kvinne og ein veldig spennande kunstnar som vi nå får vist fram på ein god måte her.

Det seier kurator og mellombels programansvarleg ved Kunstsilo, Karl Olav Segrov Mortensen.

Han har stått ansvarleg for organiseringa av utstillinga, som nå etter Oslo, Trondheim og Stavanger, gjer sitt siste stopp på Kunstsilo.

Kvinnekamp

Else Hagen (1914–2010) blei fødd på Eydehavn, like utanfor Arendal.

Ho målte gjennom fleire tiår, men hadde ein tydeleg karriere på 40,- 50-talet, fortel Mortensen.

– Ho hadde ei stor soloutstilling allereie i 1940 på Trondheim kunstforeining.

Mortensen meiner Hagens kunst framleis er relevant:

– Det er denne historiske ramma i tida før og etter andre verdskrigen som vi kanskje kjenner litt på framleis, ved at vi lever i litt urolege tider.

I tillegg hadde Hagen stor interesse for kvinnekampen, som kjem tydeleg frami bilda.

– Det er eit kunstnarskap som seier noko om kjønnsroller og familielivet som vi framleis driv med.

– Ein gløymd kunstnar

Kunstmeldar for NRK, Mona Pahle Bjerke, meiner Else Hagen fortener ein mykje breiare plass i norsk kunsthistorie enn det ho har fått.

I meldinga si frå opninga i Trondheim Kunstmusem skriv Bjerkeat det er det som gjer utstillinga viktig.

«Den bidrar til å løfte ein langt på veg gløymd kunstnar: ein kunstnar som på sitt beste, faktisk fortener å bli betrakta som ein av våre største.»

Det bekreftar kuratoren.

– Ho har vore ein kunstnar som kanskje har falle litt under radaren i seinare tid, seier Mortensen.

Feminist

Hagen var ein av dei første kvinnelege kunstnarane i Noreg som meistra å vere husmor i tillegg til å bygge ein kunstnarkarriere.

Samtidig var ho ein tydeleg stemme for kvinners liv i lys av samfunnsendringar.

– Ho hadde gode og sterke meiningar om rolla til kvinna, og korleis kvinner måtte ta ei rolle i samfunnet òg, seier Mortensen.

Ho skildra sterke, frie og sjølvstendige jenter og kvinner i måleria sine.

Kuratoren trekker fram måleriet «Familien» i samanheng med Hagens feministiske og rå uttrykk.

– Det er ein av dei kanskje råaste skildringane av kor kaotisk eit småbarnsliv kan vere.

Bildet er ikkje glamorisert på noko som helst vis.

– Det sit ei kvinne på ein stol med puppen hengande ute, og ungen ligg skrikande på fanget og hyler, seier Mortensen.

Han fortel at ho har fleire slike motiv som er ganske heftige.

Men dei var også interesserande.

– Det var interessant for fleire korleis ho torde å vise det fram.

Samarbeid

Utstillinga med tittel Else Hagen. Mellom menneske skal gi eit innblikk i Hagens kunstnariske utvikling.

Den er kuratert av Nasjonalmuseet i samarbeid med Stavanger kunstmuseum, Trondheim kunstmuseum og Kunstsilo.

Mortensen fortel at i utstillinga får publikum høve til å sjå fleire måleri frå fleire samlingar.

– I Kunstsilo vil publikum kunne gå gjennom fleire rom med litt ulike stemningar som løftar ulike tema i Hagens kunstnarskap.

Blant høgdepunkta er intime portrett og sterke forteljingar om kvinners liv i lys av samfunnsendringar.

Skal vise kunstnarar frå distriktet

Mortensen gler seg veldig til opninga. Han seier det blir gøy å sjå folk i utstillinga, og korleis dei tilnærmar seg det som er der.

– Det er alltid veldig fint.

I tida framover skal fleire kunstnarar frå distriktet anerkjennast.

Kunstsiloen skal ha ei utstilling der dei vil jobbe med deira eige gamle Kristiansands Bildegalleri, og Sørlandssamlingen, seier Mortensen.

– Da skal vi vise korleis ulike kunstnarar har jobba med regionen vår og landskapet her.