Stáhtahálddašeaddji ii guorahallagoađe Guovdageainnu

Ii leat Stáhtahálddašeaddji bargu guorahallat leat go politihkkárat Guovdageainnus háhkan alcceseaset buriid maidda sis ii leat vuoigatvuohta.

Nu čállá Stáhtahálddašeaddji NRK:ai.

Jus suohkanis ballet ahte muhtun politihkkarat leat verrošan movt ge, de fertejit váidit ášši ja lea politiija bargu guorahallat, čállá Stáhtahálddašeaddji.

Sin mielas lea eanemus lunddolaš ahte suohkana dárkkistanlávdegoddi geahččá ášši.

Ášši vuolgá das go Guovdageainnu suohkanstivra mannan vahkkus mearridii bivdit Stáhtahálddašeaddji guorahallat suohkana politihkkáriid maŋŋel go suohkandirektevra lei sádden dieđihanášši.

Dieđihanáššis čállá direktevra earet eará ahte muhtun politihkkarat bággestallet buriid alcceseaset, maidda sis ii leat vuoigatvuohta.