Guovžžat lagabus olbmuid

Guovžalohku Norggas lea maŋimuš viđa jagis lassánan 25 guovžžain ja lea dál oktiibuot 150. Varas iskosat čájehit Kárášjoga ja Guovdageainnu guovllus leat dál 20 guovžža, okta eambbo go diibmá.

Biroekonomiija Norgga Instituhta dutki Paul Eric Aspholm oaivvilda lassáneapmi sáhttá guovžžaid dađistaga sirddihit lagabui olbmuid.

Ja okta gii lea šaddan vávjit guovžžaid lahkoneami dán čavčča, lea kárášjohkalaš nisu, Christina Øvregård, gii lei nieiddainis váccašeamen go guovža hivvehii fallehit sudno. Vaikke vel beasaiga ge báhtui, de lei sudno mielas issoras dáhpáhus, muitala Øvregård.

Christina Øvregård