Doarjja filbmaprošektii

Sámediggeráđđi lea juolludan 356 000 ruvnno Paranord Film AS:ii, prošeaktajođiheaddji Linn Henriksen bokte, čájehit filmma «Tystnaden i Sápmi – ikke lenger stille» sámi suohkaniin. Maŋŋel go filbma lea čájehuvvon galget leat logaldallamat ja ságastallamat, mat galget váikkuhit dasa ahte šaddá eanet rabasvuohta tabu fáttáid birra.

– Filbma «Tystnaden i Sápmi – ikke lenger stille» lea tabuáššiid birra, ja dat lea dehálaš filbma. Lea mávssolaš addit olbmuide máhtu seksuálalaš illastemiid birra eastadeami dihte ja guottuid rievdadeami dihte, dadjá sámediggeráđđi Runar Myrnes Balto.