Brannvesenet fekk ein hard tørn, då dei skulle prøve å redde hesten opp frå elva på Øksnevad i Klepp.
Meldinga om uhellet kom i 11-tida, laurdag føremiddag.
Noko av det første brannvesenet måtte gjera var å tilkalla ein veterinær som gav hesten roande medisin.
– Den var såpass krakilsk at det var nødvendig for å kunne hjelpa den opp av elva, seier vaktleiar Svein Nesse i Rogaland brann- og redning.
Lang tid i kaldt vatn
Det var først etter om lag to timar, og eitt mislukka forsøk, at hesten kom opp på turt land igjen i 13-tida, laurdag.
Det skjedde etter at redningsmannskapa fekk festa stropper under magen og fekk hjelp av ein traktor til å trekke hesten opp.
Kvinna, som rei på hesten, er sett til av ambulansepersonell.
Ho fekk truleg eit spark av hesten, i samband med uhellet, opplyser vaktleiar Svein Nesse i Rogaland brann- og redning.