Heile 16 organisasjonar har søkt om å få tv-aksjonen for 2012. I fjor fekk Innsamlingsrådet inn 10 søkarar, og i 2009 var talet langt under halvparten av årets: då var det sju organisasjonar som søkte.
Fristen for å søke gjekk ut 1. mai. No skal Innsamlingsrådet vurdere søknadene om tv-aksjonen for 2012.
- Dei fleste søknadene er svært gode, seier sekretær for Innsamlingsrådet, Erik Berg-Hansen. Det er nokre søknader til prosjekt i Noreg, men dei fleste er til prosjekt i utlandet, fortel han. Tv-aksjonen har fleire gonger gått til prosjekt i Noreg. Sist var i 2008 då Blå Kors var tildelt tv-aksjonen.
Rådet vurderer søkarane etter desse kriteria/punkta:
1. Prosjektets formål: det må vere eit uomtvisteleg behov.
2. Søknadens kvalitet: den må vere truverdig, gjennomarbeidd og godt grunngitt.
3. Søkarorganisasjonens storleik og seriøsitet: Har organisasjonen kapasitet til å forvalte midla aksjonen bringer?
4. Tildelingsfrekvens: Ein organisasjon som har fått tv-aksjonen tidlegare kan tidlegast få den igjen etter fem år.
5. Aktualitetsperspektiv: Har det nyleg oppstått ein akutt krisesituasjon, for eksempel som etter jordskjelv eller andre katastrofar?
6. Er midla hovudsakleg til tiltak i Noreg eller utlandet?
7. Formålet må ha appell og skape givarglede i den norske befolkninga.
Hardare kamp om kroner?
- Kvifor trur du at det er så mange søkarar i år?
- Det har eg ikkje noko godt svar på. Kanskje er kampen om folks innsamlingskroner hardare enn før, spør Berg-Hansen. - Å få tv-aksjonen er jo som å trekke vinnarloddet i pengelotteriet. I tillegg er det god pr, legg han til.
Blant søkarane for tv-aksjonen 2012, er det både gjengangarar som Kirkens Nødhjelp og Røde Kors og heilt nye søkarar som Mercy Ships og Støttesenteret mot incest.
2012-søkarane
Kven som får neste års tv-aksjon blir kjent 7. juni. Det er kringkastingssjef Hans-Tore Bjerkaas som offisielt tildeler aksjonen, etter innstilling frå Innsamlingsrådet.
Her er søkarane til neste års tv-aksjon:
1. Amnesty International: «Rettferdighet!»
2. Atlas-alliansen: «På egne ben»
3. Bistandsnemnda: «En framtid verd å leve for»
4. Fokus: «Stå vakt! Kvinner og klima»
5. Hjernerådet: «Hjelp hjernen!»
6. Kirkens Nødhjelp: «Vann til millioner»
7. Kreftforeningen: «Sammen skaper vi håp»
8. Mercy ships: «Gi oss et nytt sykehusskip»
9. Nasjonalforeningen for folkehelsen: «Felles framtid»
10. Norske kvinners sanitetsforening: «Bryt stillheten!»
11. Plan Norge: «En dugnad for barnelandene»
12. Regnskogfondet: «Det er NÅ vi kan redde regnskogen»
13. Røde kors: «En kilde til håp»
14. Shelterbox: (Utan namn. Formål: Nødhjelpstelt)
15. Støttesenteret mot incest: «Frem i lyset»
16. Utviklingsfondet: «Uten mat og drikke»
Innsamlingsrådet
Desse skal vurdere søknadene:
• Helge Jakob Kolrud (Oslo, leiar)
• Annette Janicke Musæus (Oslo, vararep/ nestleiar)
• Trude Drevland (Bergen)
• Guro Hellgren (Krokkleiva)
• Anne Lise Drege (Trondheim)
• Wilhelm Wilhelmsen (Lysaker)
Utdrag frå innsamlingsrådets retningslinjer
§1. «Norsk rikskringkasting har som en del av sin målsetting å bringe bred og allsidig informasjon om viktige humanitære oppgaver i samfunnet. Som et ledd i dette arbeidet kan Norsk rikskringkasting gjennom programmer i radio og fjernsyn engasjere seg i innsamlingsaksjoner til humanitære formål.»… «Innsamlingsaksjoner til hjelpetiltak så vel utenfor som innenfor landets grenser kan godkjennes. Det forutsettes at man i slike aksjonsprogrammer legger stor vekt på å bringe bred og allsidig opplysning om formålet og om behovet for hjelp.»
§6 «Søknaden må inneholde utførlige opplysninger som viser at det foreligger et uomtvistelig behov for økonomisk støtte til det eller de foreslåtte formål.»
§8 «Organisasjonen dekker ekstrakostnader Norsk rikskringkasting pådrar seg i forbindelse med produksjonen av innsamlingsaksjonen, programmer forut for denne og andre tiltak som går ut over hva Norsk rikskringkasting normalt ville ha brukt ut fra programmessige vurderinger av aksjonen og de tilhørende sendinger».
