Bodø/Glimt inntok tabelltopp og tre poeng – Pellegrino hardt ut mot dommarane

– Det er frykteleg at vi slepper inn på feil som dette så tidleg og det er litt urutinert.

Det seier forsvarsspelar for Strømsgodset, Gustav Valsvik til TV2 i pausen.

Det stod nemleg 1-0 til Bodø/Glimt til pause då dei inviterte til heimekamp på Aspmyra stadion i kveld, etter det som har vore ei innhaldsrik fotballveke prega av to oppgjer mot Vålerenga.

Det stramma seg ytterlegare til tidlegare i kveld, då Molde pryla det gulljagande Viking med 4-0.

Med Bodø/Glimt sin siger på 2-0 over Strømsgodset glir dei heilgule til topps og stjeler førsteplassen til Viking, som no rykkar ned til ein andreplass på tabellen i Eliteserien.

Pellegrino må stå over: – Berre piss

Etter 73 spelte minutt kastar Amahl Pellegrino seg for seint inn i ei takling på Stenevik og får gult kort.

Det er Pellegrino sitt fjerde gule kort for sesongen, som betyr at han må stå over nøkkelkampen mot Molde neste helg.

– Det er jo ingenting. Det er ein vanleg duell, at ein skal dømme gult kort på det er berre piss, seier han til TV2.

Han går hardt ut mot dommaren etter kampen.

– Det er ein situasjon rett før som han ikkje gir gult kort for. Den lista som dommarane legg seg på er pinleg.

Erik Thorstvedt i TV2 meiner det er soleklart gult kort.

Vann mot gamle lagkameratar: – Rart

Tobias Gulliksen synest det var ein spesiell match i kveld.

– Det var kjekt at vi vann og vi gjorde ein god kamp, seier han til TV2 etter kampen.

Han scora 1-0-målet mot gamle lagkameratar allereie etter to spelte minutt.

– Det er jo folk du har sett heilt sidan du var pitteliten, gutar du har spelt mot sidan du er 12-13 år. Det er rart å møte dei i ei anna drakt.

– Men det var deileg at det var eg som trakk det lengste strået, så skal eg invitere dei heim til meg i kveld.

Stor keeper-brølar

Ulrik Saltnes scora andremålet 15 minutt inn i andre omgang etter at Strømsgodset-keeper Viljar Myhra gjer ein stor brølar, og Glimt leia 2-0.

Saltnes var nøgd med eigen prestasjon etter kampen.

– Det er ikkje verst å spele kamp berre tre dagar etter cupkampen som var ganske utmattande. Eg er kjempenøgd, seier han til TV2.

Knutsen: – Må justere på presset

Det var raskt tydeleg at Bodø/Glimt var lystne på å rykke opp til førsteplassen, som sørga for ein pangstart på heimebane.

Dansken Adam Sørensen var nære å avansere til 2-0 for Glimt, då han etter 31 spelte minutt spelte ein kvikk vegg med Berg, mottok ballen i mellomrom, fossar mot gjestane sin sekstenmeter og tuppa ballen mot næraste kryss frå 15 meter.

Skuddet gjekk like utanfor frå venstrebacken.

Men trenar Kjetil Knutsen såg rom til forbetring også for dei heilgule etter 45 spelte minutt:

– Vi er litt for dårlege til å skape overtal i sideromma. Så er det presset vårt som vi må justere på. Vi må ha litt større agressivitet slik at dei ikkje får spelt mellom eller bak oss, sa han til TV2.

– Må tørre meir

Strømsgodset hadde sine sjansar, men klarte ikkje å sette ballen i mål før pause som dei sårt trong.

Like før pause får Strømsgodset sin Emmanuel Danso ein smell i eigen målgard og må kaste inn handkledet. Kreshnik Krasniqi erstatta.

Dei held seg likevel godt inne i kampen, og keeper Myhra heldt på stødig vis unna fleire store Glimt-sjansar.

Elias Hoff Melkersen fekk ein gyllen moglegheit frå uventa hald, då Pellegrino forsøkte å vende heim til Haikin, men slurva i avleveringa. Ballen gjekk til Melkersen som gjekk åleine gjennom Glimt-forsvaret. Han banka til, men rett på keeper Haikin som redda.

Sogningen Gustav Valsvik i Strømsgodset meinte dei kom seg inn i kampen før pause, men at dei måtte tørre meir.

– Det er sjølvsagt farleg, men det er moglegheiter, det ser du gjennom kampen. Vi må tørre meir med ballen, for dei pressar på ein merkeleg måte og det er rom her, sa han til TV2 i pausen.

Etter denne kampen er det sju rundar igjen av Eliteserien.