Mange er skeptiske til å pusse opp badet utan fagfolk, men det er mykje du kan ordne sjølv. Både billeg og lovleg.
Her er seks gode tips til kva du kan og ikkje kan gjere sjølv.
1. Planlegging
Spør om råd i ein butikk der dei har kompetanse.
– Dei billegaste kjedene har ofte seljarar, ikkje kompetente fagfolk, seier murmeister og lærar ved Kuben vidaregåande skule, Roar Bjørnstadhaugen.
Det er lurt å få nokon til å ta ei saumfaring av badet før du begynner ei eventuell oppussing.
Dette fordi det kan vere fuktskadar i veggane eller i golvet.
Du kan også måle fukt sjølv, ved hjelp av ein fuktmålar.
Det er fullt mogleg å leggje flis på flis. Då sparar du tid og pengar sidan du slepp å fjerne det gamle, og hellinga i golvet blir den same.
- Les også:
2. Røyrleggar
Å kople av og på røyr er arbeid du ikkje har lov til å gjere sjølv.
Dersom røyrleggar berre utfører akkurat den jobben han må, kan du spare mykje pengar.
Her kan det vere lurt å avtale timepris for arbeidet. Ofte kan røyrleggar gje eit prisoverslag relativt fort når han ser badet, og du kan dermed kalkulere kostnaden inn i budsjettet.
For å spare pengar bør du skru laus baderomsmøblane sjølv før røyrleggar kjem. I tillegg kan du kvitte deg med inventaret sjølv etter at røyrleggar har kopla ifrå røyra.
Eit smart tips kan vere å ta vare på blandebatteri frå dusj og servant, då desse ofte kan brukast om igjen.
Her kan du spare ein tusenlapp eller to.
Dersom du skal kjøpe nytt dusjkabinett og servant, er det smart å montere dette ferdig før røyrleggar koplar på røyra igjen mot slutten av oppussinga.
- Les også:
3. Reingjering før flising
For klargjering av bad før flislegging treng du vatn, salmiakk og kanskje ein primer.
– Ikkje la deg lure av alle tilleggsprodukt butikkane prøvar å selje, seier Bjørnstadhaugen.
- Les også:
4. Val av fliser
– Fliser frå dei billegaste kjedene er av god kvalitet, og ofte same flisene som ein finn i dyrare butikkar, seier Roar Bjørnstadhaugen.
Men sidan prisen på flis er låg i billege butikkar, tek dei då meir betalt for utstyr og produkt ein treng til flislegging.
For å spare mest mogleg bør du kjøpe flis og våtromsplater hos dei billege butikkane, og resten hos dei litt dyrare butikkane.
Dersom du kjøper for mykje flis får du levere tilbake det du ikkje brukar på fleire av butikkane.
Derfor kan du godt vere raus i butikken slik at du slepp fleire turar fram og tilbake. Spør om dette hos den aktuelle forhandlar.
- Les også:
5. Våtromsplate
Dersom du har noko du vil skjule eller forme om på badet, kan du bruke ei våtromsplate.
Den er lett å kutte til og fin å legge flisar utanpå.
Dersom du skal bokse inn rør må du hugse på å kjøpe med ei inspeksjonsluke. Dette er for at du skal kunne følgje med på ei eventuell lekkasje.
- Les også:
6. Baderomsmøblar
Fagkonsulent i Byggmesterforbundet, Nils Jørgen Brodin, råder ein til å bruke dusjkabinett.
– Det hindrar fuktskadar på badet og golvet vil halde lenger. Dessutan er dusjkabinett ei billeg løysing, og det ser bra ut, seier han.
Dersom du vil ha same type toalett som du allereie har, treng du røyrleggar berre for å kople av og på røyr.
Dersom du har ståande toalett og ynskjer vegghengt, må ein leggje om røyra, og kostnaden på røyrleggararbeidet vil bli større.
Det kan vere lurt å kjøpe flatpakka servantskap og dusjkabinett for sjølvmontering. Då blir det lettare å frakte dersom du ikkje har tilgang til stor bil.
Sjå meir om oppussing på NRK Forbrukerinspektørene onsdag kveld.
- Les også: