Praatathiin kommuunin roolin ympäri: – Tromssa häyttyy olla myötä sovinontyössä

Raatihuonheen kangi oli tiistai aamuna täynä ihmissii ko Tromssa kommuuni piti Arctic Frontiers Open viikon alla paneelikeskustelun sen ympäri mikä oon kommuunin rooli sovinonprosessissa.

Kväänii ja saamelaisissii eđusti saametinkapresidentti Silje Karine Muotka, NSR:n johtaaja Elle Nystad, tutkiija Astrid Maria Cabrera ja Tromssan kvääniseuran johtaaja Bernt Isaksen.

Viimiseksi mainittu sai kuttun paneelhiin sen jälkhiin ko hän ja kaupungin muu kväänimiljöö reageerathiin viimi viikola ette heiđät olthiin unheetettu tapattumasta.

Sananjohtaaja Gunnar Wilhelmsen (Ap), joka eđusti kommuunii keskustelussa, sannoi ette se oli epäonnista ette niin oli käyny.

– Mutta ko met ymmärsimmä sen, oli se luonolista kuttuu heiđät myötä. Ja se oli soma ette se sopi Berntile.

Ehđotethiin monnii toimii

Niitten neljenkymmenen viiđen minutin aikana, minkä keskustelu otti, saathiin kaikki osalistuujat sannoot heiđän meiningin sen ympäri kunka kommuuni saattais olla myötä työssä sovinon etheen.

Yksi selkkee yhtheinen meininki oli ette norjalaistamispolitikki ja minoriteettiroikkiin historiikki häyđythään olla osa norjalaista historiikkii – niin ette lapset saattais oppiit niitten ympäri.

Se oon yhä moni joka tiettää vähän tahi ei mithään näistä assiista, meinas kaikki paneelissa.

– Tila oon erityisen paha ko se koskee kväänii ja meiđän historiikkii, sannoi Isaksen keskustelun aikana.

Tämän lisäksi kväänijohtaaja otti muun muassa esile kunka kväänit tarvithaan enämpi näkkyyvyyttä komuunissa ja kunka kommuunin häyttyy kohđela minoriteettii samanarvoisesti.

Yksi selkkee konkreettinen toimi olis hänen jälkhiin kans komuunin flakureekeliitten muuttaminen. Tääpänä kväänikansan päivä ei ole viralinen flakupäivä Tromssan kommuunissa.

– Met tarvittemma kans enämpi rahoitusta, niin ette met saatama paremin myötä niissä päätöksissä jokka koskethaan meitä.

Hän oon tytyväinen keskustelun ympäri ja sannoo ette hän oon optimistinen tulevaisuuđen ympäri.

– Se tapahtuu paljon hyvvää Tromsassa. Paljon tapattummii ja paljon hyvvää engasementti. Minula oon usko tulevaisuutheen.

Meinaa komuuni häyttyy olla myötä

Kans sananjohtaaja Wilhelmsen meinaa ette paneeli meni oikhein hyvin. Hän sannoo ette tämmöiset yhtheiset möötit oon tärkkeitä jos kommuuni halluu saađa saamelaiset ja kväänit paremin esile.

– Met tulema tarvittemhaan toimii joita Tottuuen- ja sovinonkommisjuunin raportti ehđottaa, mutta kans muita toimii. Siksi se oon tärkkeetä ette met praattaama yhđessä.

Sananjohtaajan jälkhiin kommuuni tekkee jo nyt töitä sen etheen ette het vahvistais minoriteetthiin statusta kaupungissa. Hän mainitti muun muassa Saamelaisen talon.

Lisäksi Wilhelmsen meinaa ette Tottuuen- ja sovinonkommisjuunin ehđottamma nasunaalinen norjalaistamispolitikin sentteri häytyis perustaat Tromsshaan.

– Mie ymmärän hyvin ette kans moni muu kommuuni halluu saađa sen, mutta mie uskon ette se olis paras sentterille, jos se perustettais Tromsshaan.