NRK Meny
Normal

Mann i 50-åra døydde etter to timar i sjøen

Livet til mannen som hamna i sjøen i Nordhordland stod ikkje til å redda.

Kai på Radøy

BLEI HENTA OPP: På denne kaia, nokre hundre meter frå brua, blei mannen henta opp og frakta vidare med helikopter til Haukeland.

Foto: Synnøve Horvei / NRK

Fleire politipatruljar, dykkarar, redningsskøyter og eit Sea King-helikopter deltok i ein større redningsaksjon etter at ein tysk mann i 50-åra i 11-tida torsdag hamna i sjøen sør for Fosenstraumen i Nordhordland.

Fosenstraumen er kjend for sterk tidvasstraum.

Over to timar seinare, klokka 13.20 blei mannen funnen nokre hundre meter sør for Fosnstraumbrua. Politiet på staden omtala tilstanden til mannen som kritisk, og han blei frakta i helikopter til Haukeland universitetssjukehus.

Klokka 14.20 fekk politiet beskjed om at mannen hadde omkome på sjukehuset. Dei pårørande er varsla.

Fosnstraumbrua

FOSNSTRAUMBRUA: Mannen gjekk tur med hunden under brua då han fall i vatnet.

Foto: Synnøve Horvei / NRK

Førstehjelp på staden

Mannen gjekk tur med hunden då han hamna på sjøen. Hunden skal ha kome seg i land. Årsaka til at dei hamna på sjøen, er framleis ukjent, melder politiet i 15.30-tida.

Livreddande førstehjelp pågjekk først på land.

– Mannen blei teken inn til land og sett under behandling av lege på staden, opplyste operasjonsleiar Frode Kolltveit i Vest politidistrikt klokka 13.45

Det er uvisst om mannen var medviten då han blei funnen. Det var ein familie som først observerte mannen, ikkje langt frå land.

Fosnstraumen redningsaksjon

MANN I TIDVASSTRAUM: Sea King-helikopter og dykkarmannskap frå brannvesenet deltok i ein omfattande redningsaksjon i Fosenstraumen i Nordhordland. Ein mann blei funnen i sjøen og sendt til sjukehus i luftambulanse.

Foto: Bergen foto og media

Låg i sjøen i over to timar

Eit koppel av mannskap frå politi, brannvesen, Redningsselskapet og Hovudredningssentralen deltok i søket.

Hovudredningssentralen i Sør-Noreg (HRS) opplyser at fire båtar i tillegg til to helikopter deltok. I tillegg blei fire hundeekvipasjar frå Norske Redningshunder og mannskap frå Røde Kors sendt til området for å hjelpe naudetatane med strandsøk.

Politiet går ut frå at mannen har vore i sjøen sidan naudetatane fekk melding om hendinga klokka 11.15.

Nødetater på Radøy

STOR REDNINGSAKSJON: Naudetatane samla like ved staden der mannen fall i vatnet.

Foto: Synnøve Horvei / NRK

– AMK fekk meldingar om at det var observert ein mann og ein hund i sjøen i nærleiken av Fosnstraumbrua. Det blei raskt sendt fleire båtar til det aktuelle området, sa operasjonsleiar Kolltveit.

Den siste observasjonen av mannen i sjøen, før han blei funnen klokka 13.20, blei gjort i tidsrommet 11.30-11.45.

– Det var ein person i ein fritidsbåt som melde frå om at han såg mannen, men me fekk ikkje tilbakemelding om fleire observasjonar etter det, sa Kolltveit.

Laster kart, vennligst vent...

MANN I SJØEN: Ein tysk statsborgar i 50-åra hamna i sjøen ved Fosnstraumbrua i Nordhordland. Mannen skal ha gått på tur med hunden, som kom seg i land. Etter to timar blei mannen funnen i sjøen. Han døydde på sjukehuset.

Siste video

Torsdag var det hviledag i VM, og bergenserne fikk teste VM-løypene.
Slik såg det ut i VM-løypene dagen etter temporittet opp Fløyen.
Vestlandsrevyen 21.september frå Torgallmenningen i Bergen.