SISTE: Klokka 11.46 melder politiet at brannen er sløkt.
– Det blir meldt om full fyr i eit hus, fortel brannsjef Grete Nesheim i Kvinnherad kommune.
Meldinga om brannen kom i 10.30-tida fredag. Lokalt brannvesen kom etter kort tid til brannstaden, som ifølge avisa Kvinnheringen ligg i eit bustadfelt i Landmarka på Halsnøy i Kvinnherad.
– Fare for spreiing
Det var på meldingstidspunktet uvisst om det var personar i huset då det tok til å brenne.
– Det er litt uklart om det er personar i huset. I ei melding blir sagt at det er eit hus som har står tomt. Politipatrulja må få kontrollera dette, seier operasjonsleiar i Haugaland og Sunnhordland politidistrikt, Lars Geitle.
– Det er full overtenning i huset, og det er hus i nærleiken. Det kan vera fare for spreiing, så viss det er personar i nabohusa vurderer vi evakuering, fortel Geitle.
Ingen personar i huset
Politiet opplyste seinare at dei ikkje hadde grunn til å tru at det var nokon i huset. Nabohusa blei evakuert, og brannvesenet konsentrerte seg om å hindre spreiing.
Klokka 11.46 kunne politiet melde om at brannen var sløkt, og at ingen personar var kome til skade. Brannvesenet hadde også klart å hindre spreiing av brannen til nabohusa.
Huset som brann er totalskadd.
