Den første meldinga om brannen kom inn like før klokka 13.30.
– Det er fem personar registrert på adressa, så langt har vi ikkje fått kontakt med dei, melde politiet på Twitter. Dei legg til at det ikkje er meldt om personar i bustaden.
Bustaden det brann i ligg i Jægerbakken. E39 i Sandviken var stengt i sørgåande retning, fordi brannmannskap måtte ha plass til å drive sløkkjearbeid.
No er det manuell dirigering i eitt felt.
Såg røyk kome ut av taket
Røykdykkarar vart raskt sendt inn for sløkke brannen og søke gjennom dei tre etasjane i bygget. Dei kunne konstatere at ingen bebuarar var til stades då det byrja å brenne. To hundar i underetasjen er henta ut i god form.
Tommy Ramstad er nabo til huset i Jægerbakken. Han høyrde sirenene komme nærare og nærare og gjekk ut for å sjå.
– Då såg eg at det velta grå røyk ut av taket på bygningen.
Veit ikkje årsaka
Klokka 14.30 er brannen sløkt.
– Det er ingen personskadar. Brannvesenet driv no med ettersløkking. Brannen spreidde seg oppover i bustaden, fortel innsatsleiar Tom Øyvind Johannessen til NRKs reporter på staden.
Årsaka til brannen er ikkje kjent.