«To Ole. From Axl Rose»

Mange med eit forhold til Guns N' Roses hadde sett fram til måndag 31. mai - dei amerikanske hardrockarane opna europaturnéen sin i Vestlandshallen i Bergen.

Men tilbakemeldingane frå presse og publikum var i beste fall blanda etter at bandet lot publikum venta i 143 minutt.

Ingen venta lenger enn Ole Jørgen Brøm. Bergensaren var på plass i Vestlandshallen før klokka var 14. Over fjorten timar seinare stod han utanfor hotellet på Bryggen - som ein av ytterst få bergensarar fekk han seg ein prat med frontfigur Axl Rose.

- Han smilte og var i godt humør og såg ut til å ha likt seg på konserten. Eg fekk autografen, «To Ole. From Axl Rose», den heng på veggen allereie, seier Brøm.

(Les meir under biletet.)

- Ingen er større

Bergensaren som for tida bur i Dubai var ikkje vond å be då han fekk vita at heltane frå 80- og 90-talet skulle på scenen i heimbyen.

- For meg er han den største i rocken. Nesten uansett kva han gjer, så tilgjer eg han, seier Brøm som gir blaffen i at helten lot publikummet venta i timesvis.

- Han er ein primadonna, men ein primadonna eg diggar. Så at dei venta til etter klokka elleve med å komma på scenen er "eit fett", seier 36-åringen som har vore Guns N' Roses-fan så godt som heile livet.

Også ein gong tidlegare har han handhelst på Axl Rose. Det var i Stockholm i 1993.

- Satsar på Moskva

17 år seinare vart Brøm vitne til at bandmedlemmane tok seg ein nattetur i eit folketomt Bergen sentrum. Bryggen og Sjøfartsmonumentet var nokre av attraksjonane rockarane fekk med seg før dei flaug vidare til Oslo.

(Les meir under biletet)

Brøm er skråsikker på at han ikkje har sett rocke-heltane i levande live for siste gong. Konsertopplevinga i Vestlandshallen gav i aller høgaste grad meirsmak.

- Dei spelar i Moskva 8. juni. Eg håpar eg får ordna meg fri!