– Det er klart at det skremmer oss at ei tung betongbru kollapsar over vegen, når ein tenker på kva som kunne ha skjedd, seier fungerande prosjektleiar for drift- og vedlikehald i Statens vegvesen, Bjørn Nyhus.
Teknikarar frå vegvesenet og politiet er i gang med å undersøke gangbrua som raste over riksveg 35 torsdag kveld. Brua frå 1979 er av ein type som blei mykje brukt på sytti- og åttitalet rundt om i Noreg. Ho er bygd av preproduserte betongelement.
Statens vegvesen kontrollerte gangbrua over riksveg 35 for eitt år sidan. Dei veit enno ikkje kvifor brua raste saman.
Usikre på kvifor brua kollapsa
Gangbrua ligg i eit populært turområde i Vikersund. Ho har blant anna blitt brukt av skuleelevar som er på tur i skogen.
Foto: Vergard M. Aas / Presse 3.0– Vi er ikkje nærare noko konklusjon, men det er formelt politiet som fullfører etterforskinga. Vi kan heller ikkje sjå bort frå at lastebilen som var i nærleiken av brua då den kollapsa hadde noko med det å gjere, seier Nyhus.
Lastebilsjåføren seier til Bygdeposten at han høyrde ein smell, men merka ingenting på bilen. Han kan ikkje forstå at lastebilen kan ha vore borti brua.
– Vi vil ta tak i dette på måndag, og då kan det uavhengig av politiets etterforsking bli set i gong inspeksjonar av liknande bruer rundt om i Noreg, seier Nyhus.
