Fekk plutseleg krigen tett på: – Gløymer det aldri

Søndagen for to veker sidan hadde Kongsdelene kyrkje valt krigen i Ukraina som tema for gudstenesta.

Fadum avslutta med å spele den ukrainske nasjonalsongen. Ho hadde ikkje spelt mange taktane før det skjedde.

Rett under der ho sett, hadde Taisiia Yisinska reist seg, lagt handa på hjartet og begynt å synge så høgt ho kunne.

Tre dagar tidlegare flykta ho i all hast frå heimen i Kyiv. No reiste ho seg spontant i det tonane frå nasjonalsongen runga gjennom kyrkja.

Tusen tankar

– Eg kan ikkje beskrive den kjensla eg fekk då eg høyrde ho synge. Ho song så høgt og tydeleg. Eg kjem aldri til å gløyme den dagen, seier Fadum.

I spegelen kunne ho sjå at folk hadde reist seg og vart rørt av songen.

Tusen tankar gjekk gjennom hovudet.

– Eg skjønte jo at dette var ukrainsk song og at det var nokon som kunne nasjonalsongen – i vesle Kongsdelene kyrkje. Ingen kjem til å gløyme den dagen.

Ein liten tåre fyller augnekroken når ho tenker på det.

– Veldig stolt

Fadum fekk ikkje møtt Yisinska eller takka ho for songen der og då. Men ei veke seinare får dei gitt kvarandre ein klem som varmar i hjartet.

Yisinska omskapar hendinga for NRK og fortel kva som skjedde den søndagen ved hjelp av tolk Svitlana Biberg. Ho var ikkje heilt komfortabel med å synge så høgt.

Men kjensla av krigen sett i kroppen. Det var så ferskt. Ho berre måtte synge.

At kyrkjelyden reiste seg, opplevde ho som sterkt.

– Eg følte så mykje støtte til det ukrainske folket. Eg er så takksam for at eg fekk kome hit, seier ho.

– Eg ønsker å lære meg språket etter kvart. Så vil eg jobbe, sjølv om eg er pensjonist..

Men tryggleiken har kosta. Heime i Ukraina har ho mann, katt og hund.

– Det er tungt.

Ho flykta til Norge fordi ho har ei dotter og barnebarn her. Barnebarnet er konfirmant og var der søndagen bestemor song.

– Eg vart overraska. Ho har aldri gjort noko slikt før. Men eg er veldig stolt, det er tøft gjort. Det er fint å ha bestemor heime. No er ho trygg, seier barnebarnet Kira Hestnes stille.