Ein av dei første kringkastingsstasjonane i Noreg vart grunnlagt i Ålesund. Berre Oslo, Bergen og Tromsø var tidlegare ute. I Ålesund starta det alt hausten 1924 med Telegrafvesenets prøvesendingar mellom land og sjø – til og frå fiskeflåten. Prøvesendingane pågjekk til langt ut på våren 1925. Dei bana veg for skipinga av kystradiostasjonen Ålesund Radio, og framskunda i tillegg interessa for allmenn kringkasting i sunnmørsbyen.
Aalesund Radiolag, som nokre privatpersonar gjekk saman om, dreiv ei form for varsam lokalradio over sendaren til Ålesund Radio eit par timar dagleg frå hausten 1925. Frå første stund arbeidde laget for å få etablert eit kringkastingsselskap i Ålesund.
Ålesund har rike kringkastingstradisjonar. Alt hausten 1924 ble det gjort forsøk med sendingar.
Aalesund Kringkastingselskap A/S blei skipa 12. februar 1927. Det var det fjerde i Noreg etter Oslo, Bergen og Tromsø. Det var sendingar kvar dag i om lag tre timar, men ikkje alt blei produsert lokalt. Radiostasjonen i Ålesund var ein reléstasjon og fekk såleis ein del av programma overført frå kringkastingsselskapa i Oslo og Bergen.
Då kringkastinga i Noreg blei monopolisert i 1933, innløyste NRK dei fire private kringkastingsselskapa som var i landet.
Dei første kaotiske krigsdøgna i 1940 kom NRK i Ålesund til å spele ei heilt sentral rolle. Det var fordi Vigra kringkastar var den siste frie hovudsendaren i Sør-Noreg. Men den 15. april var det slutt. Då blei sendaren bomba sønder og saman.
NRK Møre og Romsdal sitt redaksjonslokale i Ålesund.
Kringkastinga i Møre og Romsdal fekk status som avdelingskontor på line med Bergen, Trondheim, Stavanger, Kristiansand, Tromsø, Bodø og Vadsø i 1947.
NRK Møre og Romsdal fekk lokalkontor i Kristiansund i 1976, i Molde i 1978.
TV gjorde sitt inntog i NRK i Møre og Romsdal først med bruk av film og kontaktfotograf i 1960-åra, og med eige klippebord i 1974. Berbart LET-utstyr for farge kom i 1982, då distriktskontoret også fekk eigen tv-medarbeidar.
NRK Møre og Romsdal starta eigne daglege tv-sendingar 10.mars 1997, etter halvtanna års samarbeid med trøndelagsfylka om MidtNytt.
NRK Møre og Romsdal flytta til nye lokale i Parkgata 6 i Ålesund sommaren 1996.
Rune Hustad er ein av dei 55 som arbeidar ved NRK Møre og Romsdal. (Foto: NRK/Kjell Jøran Hansen)
Plassering
NRK Møre og Romsdal har hovudredaksjon i Jugendbyen Ålesund, Sunnmøres hovudstad og den største byen i Møre og Romsdal. Redaksjonen ligg midt i sentrum av Ålesund, på toppen av eit kjøpesenter, med lyse og luftige lokale.
NRK Møre og Romsdal har lokalkontor i Kristiansund og Molde.
I Kristiansund ligg redaksjonen sentralt til i gågata Nedre Enggate i sentrum av byen. Også i Molde er plasseringa av redaksjonen sentral. Her ligg kontoret på kaia, rett ved hurtigruteanløpa og 100 meter frå hovudgata i Molde, og ein kort spasertur frå Molde stadion og Bjørnsonhuset.
Staben
NRK Møre og Romsdal har i 2003 52 årsverk. I tillegg kjem tre riksmedarbeidarar (to i Ålesund og ein i Molde).
Oppslutning
NRK Møre og Romsdal står sterkt blant innbyggarane i fylket. Dei siste åra har oppslutninga om NRK Møre og Romsdals radiosendingar vore svært stabil. Rundt 40 prosents av innbyggarane i fylket lyttar dagleg til ei eller fleire av sendingane. Det siste året har oppslutninga auka. Eit særmerke er at oppslutninga er jamnt fordelt på Sunnmøre, Romsdal og Nordmøre. Konkurransen på radiosida er hard og kjem frå P4 og dei tre byradioane i Kristiansund, Molde og Ålesund
Også oppslutninga om NRK Møre og Romsdals tv-sendinga er god, trass i at sendingane ikkje blir distribuert på satellitt. Oppslutninga har auka jamnt etter at Møre og Romsdal fekk eigne sendingar i 1997, og spesielt sidan 2002 har auken vore stor. Rundt 30 prosent av innbyggarane i fylket ser no dagleg på minst ei av dei to nyheitssendingane.
I Møre og Romsdal er det to private lokaltv-stasjonar, TV Sunnmøre og TV Nordvest. Trass i at dei har betydeleg meir sendetid er NRK Møre og Romsdal no klart størst, både på Nordmøre, i Romsdal og på Sunnmøre. Også oppslutninga om NRK Møre og Romsdals tv-sendingar er jamnt fordelt i fylket.
Også oppslutninga om NRK Møre og Romsdals nettsider har auka kraftig i år, og utgjer no rundt 150.000 sidevisingar kvar månad.
Gjennom oppslutninga er NRK Møre og Romsdal den klart viktigaste medieaktøren i fylket.