– Eg røykjer betydelege mindre i fastetida, seier Bowitz, sokneprest i Den katolske kyrkja i Stavanger.
I dag er det oskeonsdag, starten for den 40 dagar lange kristne fastetida før påske. Dagen kjem frå Den katolske kyrkja og blir feira av katolikkar verda over.
– Nokre drikk mindre alkohol
I fasta handlar det om å gi avkall på noko. For presten Rolf Bowitz dreier det seg om å stumpa røyken. For andre kan det handla om å setja sterkare saker på hylla.
– Nokre drikk mindre alkohol i fastetida. For eksempel ved å la vera å ta «pjolteren» kvar einaste kveld, seier Bowitz.
Teater-faste
Soknepresten seier det handlar om å gi avkall på noko som betyr noko for deg for å konsentrera seg om det religiøse i fastetida. Det kan vera mat, drikke – men også andre ting.
– I gamle dagar var det ein sokneprest i Stavanger som oppmoda til å gå mindre på offentlege arrangement. Då gjekk ein ikkje på kino og teater.
Facebook-faste
I den seinare tida har fasta teke nye retningar. For mange i dag handlar det kanskje om å logg ut av internett og Facebook.
– Dette har blitt den moderne måten å fasta på, seier soknepresten.
Bowitz understrekar at barn, sjuke og gamle er fritekne frå fastetida i den Katolske kyrkja.
