To vogntog velta og fleire personbilar vart skada, då Danmarksferja Bergensfjord kjørte inn i åtte meters bølger utforbi Jærens rev i natt.
Det var kraftig vind kombinert med store dønningar, som førte til skadane på vogntog og 20 bilar ombord.
Ingen av dei 230 passasjerane kom til skade.
- Etter kort tid fekk mannskapet kontroll over situasjonen, seier kaptein Finn Esben Hansen ombord i Bergensfjord.
Han presiserer at det aldri var nokon kritisk situasjon med omsyn til sikkerhet og at det aldri oppsto panikk.
Til ettersyn
Klokka sju laurdag tidleg, kom "Bergensfjord" til Egersund. I føremiddag har representantar frå forsikringsselskapet til reiarlaget Fjordline, vore ombord for å taksera skadane.
Avlyst avgang
- Som følge av hendinga måtte me avlyse den planlagte seilinga frå Kristiansand i dag, seier administrerande direktør Ingvald Fardal. Derimot kjem den planlagte avgangen frå Egersund til Hanstholm til å gå som planlagt klokka 17 i ettermiddag.