Bergen kommune har erklært krig mot Hells Angels og Bandidos. Likevel var det uønska MC-medlemmar som stod for arbeidet då den nye asfalten rundt rådhuset blei lagt.
Lensmann i Sund, Askøy, Fjell og Øygarden, Odd Dale.
Foto: Ingvil Aaen TorpeFor lokala til Bergen Asfalt Service på Sotra er også klubblokala til prøvemedlemmar i Bandidos. Det går fram av jakkemerka og av heimesidene til klubben.
Også lensmann Odd Dale i Sotra, Askøy og Øygarden lensmannsdistrikt stadfestar koplinga.
- Det er dei same som asfalterer og er medlemmar i MC-klubben. Asfaltlegging er vel og bra, men dei bør kutta ut den motorsykkeldelen der dei heng rundt Bandidos, seier lensmannen.
Inga avtale med MC-medlemmane
Bergen kommune seier dei ikkje kjende til forholdet.
- Me inngjekk ein avtale med Anleggsgartner Wikholm. Dei brukte Bergen Asfalt Service som underentrepenør. Koplinga til MC-miljøet blei me ikkje kjend med før de (NRK) tok kontakt med oss, seier byråd for eigedom og samferdsel i Bergen kommune, Øistein Christoffersen (Frp).
Byråd for eigedom og samferdsel i Bergen, Øistein Christoffersen (Frp)
Foto: Ingvil Aaen Torpe/NRKHan seier kommunen ikkje kunne ha handtert saka noko annleis.
- Det er først i januar i år at me har fått ei ny lov for offentlege anskaffingar som gjer det mogeleg for oss å avvisa MC-medlemmar i 1-prosent-klubbar med kriminelt rulleblad. Det reglementet vil me bruka i forhold til nye avtaler, seier han.
Vil ikkje kommentera saka
Karane som er på veg inn i Bandidos blir skulda for å spreia frykt og å driva med lysskye aktivitetar.
- Me veit at desse 1-prosent-klubbane livnærer seg på kriminalitet, seier lensmann Odd Dale.
Sjefen for asfaltfirmaet vil ikkje kommentera koplinga. Han har fått beskjed av Bandidos om å ikkje gje kommentarar til media.