Ordføraren i Rauma, Torbjørn Rødstøl frå Senterpartiet, meiner det hastar med å få på plass rassikring i Romsdalen.
I følgje ein rapport frå Norges Geologiske Undersøkelser vil eit steinskred frå fjellpartiet Mannen i Romsdalen få dramatiske følgjer.
Les også:
Fryktar ras
Folk må kjenne seg trygge på at det vil vere mogleg å varsle eit slikt ras, seier Rødstøl.
- Vi må prøve å få på plass varslingsutstyr så fort som mogleg oppe i fjellet. Slik at ein får godt varsel lang tid i førevegen om det skulle kome eit skred.
I følgje NGU vil eit steinskred fra fjellpartiet Mannen gå over heile dalbotnen og demme opp Rauma-vassdraget. I verste fall vert det ei oppdemningshøgd på 20 meter. Skredet vil skape ein innsjø som strekkjer seg sju kilometer opp i dalen. 60 eigedomar hamnar under vatn. Ni av desse har fast busetnad. Skredet vil også ramme all trafikk med bil og tog gjennom Romsdalen.
I Stranda kommune er eit slikt varslingssystem på plass. Åkneset i Stranda er høgrisikofjell som geologane følgjer nøye. Under rasøvinga Tyr i fjor haust, vart det sendt ut SMS-varsling til alle som heldt til i området.
Vil skaffe midlar
Under landsmøtet i Senterpartiet i Ålesund i helga vart partileiar og samferdsleminister, Liv Signe Navarsete, orientert om dei dramatiske konklusjonane i NGU-rapporten, og Raumaordføraren sitt ynskje om eit varslingssystem i fjellet.
- Eg har sagt til Torbjørn Rødstøl at må vi må ta med oss denne saka inn i regjering. Kommunen må lage ei sak og sende til NVE, og så må vi prøve å få på plass midlar til eit overvakingssystem, seier ho.
Navarsete trur det er realistisk å få på plass eit slikt varslingssystem.
- Det er ikkje snakk om så enorme summar at det er umogleg å få det på plass. Når vi ser på kva som kan gå tapt, både med infrastruktur og sjøvsagt også tryggleiken for bygdefolket, så er dette ei sak vi må prøve å finne ei god løysing på.
Torbjørn Rødstøl, vert skremd av det NGU har trekt fram i rapporten sin.
- Det er klart det er dramatisk når ein ser på så store fjellmasser som er i rørsle. Nettopp difor er det så viktig å få på plass utstyr slik ein får eit førevarsel om noko skal hende, seier Rødstøl.