Se også: Detaljert organisasjonskart

NRK er inndelt i fem divisjonar. Denne organiseringa tredde i kraft 1. mars 2009. Tilhøvet mellom divisjonane er slik:

• Marienlystdivisjonen - produserer program

• Distriktsdivisjonen - produserer program

• NRK Sápmi - produserer program

• NRK Kringkasting – gir produksjonsoppdrag

• Teknologidivisjonen - tener dei andre divisjonane

Kringkastingssjefen er øvste sjef i NRK. Hans-Tore Bjerkaas er noverande kringkastingssjef.

Les meir: Kringkastingsjefane i NRK

Sentrale stabar
Direkte under han ligg dei fire sentrale stabane. Dei tener heile organisasjonen.

Administrasjon og finans er leia av Jan Espen Lohne, og inkluderer dokumentarkivet, service og sikkerheitstenester, økonomi og regnskap.

Juridisk avdeling er leia av Olav Nyhus.

Sigurd Sandvin er kommunikasjonsdirektør og leiar for informasjonsavdelinga. Avdelinga har ansvar for informasjon om NRK internt og eksternt. Publikumsservice inngår også i avdelinga.

Solveig Jølstad er organisasjonsdirektør. Organisasjonsavdelinga har ansvar for å utvikle strategiar og tiltak innanfor personal- og organisasjonsarbeidet for heile NRK.

Organisasjonsstruktur: Kringkastarmodellen

I 2000 blei NRK Kringkasting skilt ut som programsettande divisjon. Det betyr at divisjonen bestiller program frå dei programproduserande divisjonane i NRK og frå eksterne produsentar. Divisjonsinndelinga i Kringkastingsmodellen, inneber ei kunde- og leverandørinndeling internt i organisasjonen, der NRK Kringkasting er kunden. Det er NRK Kringkasting som gir produksjonsoppdrag og som sett budsjett-rammene for kvar produksjon.

NRK Kringkasting

NRK Kringkasting har ansvaret for NRKs program-, publiserings-, investerings-, og teknologistrategi.

Det er NRKs programsettande divisjon. Det vil seie at denne divisjonen bestiller program frå dei programproduserande divisjonane i NRK og frå eksterne produsentar. I NRK Kringkasting finn du kanalsjefane for radio, fjernsyn og nye medium.

Her finn du og NRK Analyse, forskingsavdelinga i NRK.
NRK Kringkasting har ansvar for utvikling, distribusjon, marknadsføring, programomtale og NRKs rettar.

Avdelingar i NRK Kringkaster

Tv-kringkastar: Arne Helsingen er tv-sjef. TV-kringkastar har ansvar for programsetting av tv-kanalane til NRK.
Radiokringkastar: Marius Lillelien er radiosjef. Radiokringkastar har ansvar for programsetting av dei ni radiokanalane til NRK. Kanalane har eigne kanalsjefar.
Sindre Østgård er sjef for Nye medium.

Mediedirektør NRK Kringkasting
Annika Biørnstad (født 1957) er direktør for NRK Kringkasting. Ho har studert førsteavdeling jus, og gått medielinja ved Høgskulen i Volda. Ho har arbeidd i NRK sidan 1981, då starta ho som redaksjonsassistent i Dagsrevyen. Sidan har ho arbeidd som produksjonsassistent, script, produksjonsleiar, producer, prosjektleiar, redaksjonssjef og sist som fjernsynssjef.

NRK Marienlystdivisjonen

NRK Marienlystdivisjonen er ein programproduserande divisjon i NRK.

Divisjonen består av åtte avdelingar med ansvar for produksjon til alle plattformer innanfor fagfelta sine. Redaksjonane er inndelte i fleire prosjekt som vert leia av ein prosjektleiar, og som leverer innhald innanfor eit avgrensa område av redaksjonens fagfelt.

I Nyheiter og Sport er det redaksjonsleiarar og vaktsjefar som rapporterer sine område til redaksjonssjefane, mens Produksjonsavdelinga er inndelt i seksjonar og grupper etter dei ulike fagområda.

Avdelingar:

• Barn
• Dokumentar og samfunn
• Kultur
• Nyheiter
• Produksjon
• Sport
• Underhaldning
• Ung

Direktør i Marienlystdivisjonen
Per Arne Kalbakk har lang erfaring frå NRK – som blant anna programsjef i det som var Faktaavdelinga, nyheitssjef og distriktsredaktør i Østlandssendinga. Etter i overkant av eitt år i Dagbladet vende han tilbake til NRK i 2008.

NRK Distriktsdivisjonen

Distriktsdivisjonen ein programproduserande divisjon i NRK. Distriktsdivisjonen består mellom anna av 12 distriktskontor spreidd ut over heile landet, frå Finnmark i nord til Kristiansand i sør. Kvar einaste dag produserer distriktskontora nesten sju timar lokalradio på P1, to daglege, lokale nyheitssendingar på TV og lokale nyheitssider på nett.

Distriktskontora lager også også program som vert sendt på riksdekkande radio eller tv.

Distriktsdivisjonen har også ansvaret for innhaldet i radiokanalane P3 og MP3.

Dei store regionkontora i Troms/Finnmark, Hordaland og Trøndelag har i tillegg ansvar for omfattande, dagleg produksjon av program til nasjonale sendingar.

Distriktsdivisjonens overordna målsetting er å lage nyheiter og program frå heile landet – til heile landet. Divisjonen har hovedsete på Tyholt i Trondheim.

Direktøren
Grethe Gynnild-Johnsen har arbeidd i NRK sidan 1993, dei siste ti åra som leiar. Ho har blant anna vore sportsredaktør. I 2004 blei ho redaktør for TV-nyheitene og seinare nyheitsjef for den samanslåtte avdelinga for nyheiter for radio, TV og nett.

NRK Sápmi

NRK Sàpmi er den største samiske medieinstitusjonen i Norden. Hovudkontoret ligg i Karasjok, med lokalkontor i Oslo, Kautokeino, Kåfjord, Skånland, Snåsa, Tana, Tromsø og Tysfjord. NRK Sápmi er ein fleirmedial divisjon, og presenterer dagleg nyheiter i radio, fjernsyn, internett og Tekst-TV.

NRK Sápmi er som eit mini-NRK med både kringkastar (bestillar) og programproduserande avdelingar innanfor divisjonen.

Avdelingar

• Nyheits- og aktualitetsredaksjonen
• Prosjektredaksjon
• Stab

Mål
NRK skal sikre eit breidt tilbod av programm og tenester som styrkar samisk språk, kultur og identitet. I vedtektene til NRK heiter det mellom anna at NRKs riksdekkande programtilbod i både radio og fjernsyn minst skal innehalde:

• Daglege sendingar for den samiske befolkning.
• Jamnlege programmer for barn og unge på samisk.

NRK Sápmi skal gjennom programverksemda medverke til at alle samar kan og vil vere samar, og at resten av befolkninga får auka kunnskap om samar, den samiske kulturen og samfunnet.

Direktøren
Nils Johan Heatta (født 1954) er utdanna programingeniør i NRK og har også utdanning frå Forsvarets Høyskole. Han har arbeidd som programingeniør i NRK Sápmi og i SR Sámi Radio (Kiruna, Sverige). Heatta har også vore journalist og vaktsjef i NRK Sápmi der han i 1985 blei sameradiosjef.

NRK Teknologidivisjonen

Ansvarsområda til divisjonen omfattar mellom anna infrastruktur, teknologi og servicetenester i NRK.

I tillegg til fire stabar for økonomi, personal, beredskap og tryggleik, er divisjonen inndelt i tre større avdelingar: Publisering, produksjonssystem og IT.

Teknologidirektør
Nils Bjarne Foss (f. 1960) overtok som Teknologidirektør 1. januar 2011. Då kom han frå stillinga som utviklingssjef i Distriktsdivisjonen.

Kringkastingsorkesteret

NRK vedtektene slår fast at Kringkastingsorkesteret er ein del av kjerneverksemda til NRK:

”NRK skal halde eit fast orkester som dekker eit breidt repertoar frå underhaldningsmusikk til symfonisk musikk”. (Vedtektene)

Kringkastingsorkesteret (KORK) har eksistert sidan 1946. KORK har ofte konsertar og i tillegg opptrer orkesteret på tv, i radio og på internett. Orkesteret har også gitt ut cd-ar og bøker.

Les meir om kringkastingsorkesteret

Biblioteket

Biblioteket i NRK finn du på Marienlyst. Det er berre for dei tilsette i NRK.

Du kan lese om NRKs datterselskap her:
Forretningsverksemda til NRK