Andre runde i cupen vart spelt onsdag kveld, og i alt sju lokale lag var i aksjon. Fleire av dei fekk tøff motstand frå eliteserielag.
Nybergsund er attende i 2. divisjon etter eit lengre opphald i divisjonen over. Men mot Hønefoss ville dei vise at dei framleis er gode nok til å kjempe mot dei beste. Ved pause heldt dei overraskingslaget frå eliteserien, Hønefoss, til 1–1 etter mål av Jonas Enkerud.
I andre omgang viste Hønefoss kva som er grunnen til at dei rykka opp og Nybergsund ned i fjor, og kontrollerte inn ein grei 4-1-seier i Trysil.
Både andredivisjonslaget Gjøvik og tredjedivisjonslaget Ottestad møtte tøff eliteseriemotstand, og klarte ikkje å smelle noko cupbombe. Men dei kom frå det med æra i behald, Ottestad tapte 2–0 mot Lillestrøm, medan Gjøvik FF tapte 2–0 heime mot Strømsgodset.
HamKam avgjorde i andreomgang
På Briskeby var gjestane Valdres frekke og freidige nok til å ta leiinga allereie etter tre minutt ved Thomas Morgan. Men andredivisjonslaget var ikkje lenge i paradis, berre sju minutt seinare utlikna Thomas Lehne Olsen for HamKam.
Dette resultatet stod seg til pause, men det vart raskt fleire mål i ein fartsfylt men publikumsfattig kamp på Briskeby. Fyrst sette Ørjan Berg Hansen inn 2-1, før Vegar Bjerke like etterpå sende hamarsingane opp til 3–1 på straffe.
Som om ikkje det var nok avgjorde Emil Dahle og Christer Jensen med mål mot slutten, og det ende til slutt 5–1 til HamKam.
Kongsvinger har hatt ein bra start i 1. divisjon under den karismatiske Tom Nordlie, og tok seg også greitt vidare i cupen. Borte mot Lørenskog vann dei 2–1, etter to mål av Samir Fazlagic.
Raufoss tok seg også vidare til tredje runde i cupen etter at Oliver Berg og Petter Senstad skåra måla i 2-0-kampen mot Strømmen.