Kraftige åtak i Ukraina – minst éin drepen og fleire skadde

Det er meldt om kraftige åtak mot fleire byar i Ukraina natt til laurdag, inkludert Zaporizjzja, Pavlohrad, Dnipro, Tsjernihiv og Tsjerkasy.

I Zaporizjzja melder redningstenestene i byen om eit massivt åtak – ifølgje redningsmannskapa er éin person drepen og 24 personar skadde.

Samstundes melder det ukrainske militæret at dei har gjennomført åtak mot dei russiske oljeraffineria Krasnodar og Syzran i løpet av natta.

Angreip med over 500 dronar

Klokka 08 norsk tid melder det ukrainske luftforsvaret at Russland fyrte av 537 dronar og 45 rakettar over natta. 548 av desse blei skotne ned medan sju dronar og rakettar trefte mål - i fleire ukrainske byrar.

Åtte personar, der tre skal vere born, er frakta til sjukehus, ifølge guvernør for Zaporizjzja Ivan Fedorov.

Åtaka haldt fram utover morgonen. Den austlege regionen Dnipropetrovsk er også under massivt åtak, ifølge guvernør Serhij Lysak.

Han melder om eksplosjonar fleire stader i fylket.

Som respons er luftforsvaret i Polen sett i beredskap, og har sendt jagarfly på vengene over sitt eige luftrom, skriv luftforsvaret på X.

I tillegg er den tidlegare parlamentspresidenten Andriy Parubiy drepen etter ei skyteepisode i Lviv. Det stadfestar Zelenskyj på X laurdag føremiddag. Saka er førebels under etterforsking.

– Regelrett terrorbombing

Åtaka kjem berre to døgn etter det nest største åtaket mot Ukraina sidan Russlands fullskalainvasjon i februar 2022.

23 personar blei drepne og nærare 50 personar blei såra.

Oberstløytnant Palle Ydstebø ved Krigsskolen bit seg merke i at typen åtak er det same som tidlegare, men at dei har blitt større i omfang.

– Enkelte ukrainske observatørar ser at det har vore ein auke i kor mange dronar og missil ukrainarane skyt ned i det siste. Det kan tyde på at dei har fått meir ammunisjon og betre kontroll på luftrommet t sitt, konstaterer Ydstebø.

– Som tidlegare går Russland til åtak på sivil infrastruktur, straumforsyning, kraftverk i tillegg til regelrett terrorbombing av ukrainske byar, seier Ydstebø.

Leitar etter Russland sine svake punkt

Samstundes har Ukraina utført store åtak mot dei russiske oljeraffineria Krasnodar og Syzran.

– Slike åtak påverkar både prisar og tilgangar på den internasjonale marknaden, seier Ydstebø.

Oljeraffineri er industrielle prosessanlegg der råolje blir omdanna til ulike kvalitetar av petroleum. Dei er difor viktige for å sikre for eksempel drivstoff til transport i Russland.

Ydstebø peikar også på at russarane slit med å få reparert raffineria. Mange av delane dei treng er bygde av utanlandske selskap som har stoppa eksport til Russland. Difor får dei ikkje tak i reservedelar og teknikarar som kan reparere dei.

– Så her har Ukraina funne ei av dei kritiske notane i både det russiske samfunnsmaskineriet, men òg i krigføringskapasieten.

Ukraina skal òg ha sendt dronar til Russland. Laurdag føremiddag seier det russiske forsvarsdepartementet at dei skaut ned 20 dronar laurdag morgon. 18 av desse var over krimhalvøya og dei to andre dronane blei nedskotne over Smolensk-regionen vest i Russland.

Håpar framleis på samtale med Russland

Samtidig jobbar USAs president Donald Trump for å få på plass eit møte mellom Putin og Zelenskyj, ifølge tenestepersonar i Det kvite hus.

Viljen frå russiske side verkar til å vere laber for å få til eit slikt møte.

Saman med Zelenskyj har europeiske leiarar sett førstkomande måndag som ein frist for Russland å godta invitasjonen til eit møte med Ukraina.

– Det blir interessant å sjå om det skjer noko då, eller om det framleis blir utsetjing, seier Ydstebø.

Zelenskyj sa tidlegare at åtaket torsdag viser Russland si tilnærming til diplomati.

– Russland vel rakettar framfor forhandlingsbordet. Dei vel å halde fram med å drepe i staden for å avslutte krigen, skreiv presidenten på X.

Interessert i meir stoff frå utanriksredaksjonen? Høyr podkasten Urix her: