Den russiske redaktøren og politiske analytikaren Darja Dugina har omkome etter at ein bil eksploderte utanfor Moskva seint laurdag kveld.
Det skriv det russiske, statlege nyheitsbyrået Ria Novosti.
Ho er dotter av den kjende russiske ideologen Aleksandr Dugin.
Den russiske avisa Izvestiva skriv på Twitter at Dugin er lagt inn på sjukehus etter hendinga. Det er ikkje kjent om han er skadd eller ikkje.
Hevdar faren var målet
Denis Pusjilin, som leier den russiskvennlege separatistrørsla i Donetsk i Ukraina, seier «terroristar frå det ukrainske regimet» står bak eksplosjonen, og at det eigentlege målet for angrepet var Aleksandr Dugin.
Ukraina avviser på si side at det står bak eksplosjonen, skriv NTB.
– Ukraina har sjølvsagt ikkje noko med eksplosjonen å gjere, fordi vi ikkje er ein kriminell stat, og særleg ikkje ein terroriststat, slik Russland er, seier rådgivaren til president Volodymyr Zelenskyj, Mykhailo Podoljak.
På Telegram er det lagt ut ein video som skal vise etterspelet på den aktuelle staden.
Vrakrestar ligg strødd i vegen. Det er også bilete i sosiale medium av det som skal vere ein svært opprørt Aleksandr Dugin.
Eksplosjonen fann stad i Odintsovo-distriktet, som ligg i Moskva oblast.
Har vore sanksjonert
Den 29 år gamle dottera er blant dei mange russarane som har vorte sanksjonerte av vestlege land i form av fryste midlar og innreisenekt etter den russiske invasjonen.
Ho er blant anna sjefredaktør for nettsida United World International, som Storbritannia har omtalt som ein nettstad som «fremjar prorussisk desinformasjon».
Den britiske regjeringa omtalte henne i april som ein «hyppig og profilert» kjelde til «desinformasjon om Ukraina og den russiske invasjonen av Ukraina på fleire nettbaserte plattformer».
Også USA, Canada og Australia har sanksjonert henne.
Sjefideolog
Aleksandr Dugin har av enkelte vorte rekna som den ideologiske hjernen bak Russlands invasjon av Ukraina, og som ein nær rådgivar for Russlands president Vladimir Putin, men det er uklart akkurat kor tett forholdet deira er.
Han har vore avdelingsleiar ved Institutt for sosiologi for internasjonale relasjonar ved Universitetet i Moskva, har jobba som mellom anna førelesar, politikar og TV-kommentator.
I tillegg har han gitt ut ei lang rekkje bøker.
Den mest kjende boka er «Osnovy geopolitiki: geopoliticheskoe budushchee Rossii» frå 1997, på norsk «Grunnleggjande om geopolitikk: Russlands geopolitiske framtid».
I boka skisserer han kva taktikk Russland bør bruke for å byggje seg opp igjen som ein global maktfaktor, skriv CBS.
Han skriv at Russland må ta i bruk desinformasjon, destabilisering og annektering, ei oppskrift Putin har teke i bruk.
Eitt av måla for annektering bør ifølgje Dugin vere Ukraina.
I boka skriv han at Russland, som ligg mellom Europa og Asia ikkje er kompatibelt med Vestens liberale demokrati og dei tilhøyrande verdiane.
Draumen om imperiet
I staden meiner Dugin at Russland bør ta sikte på å sameine Europa og Asia til eitt kjempeimperium under kontrollen til etniske russarar.
Filosofien blir gjerne kalla ny-eurasianisme. Eitt hinder på vegen til imperiet er ifølgje Dugin eit uavhengig Ukraina.
– Ukraina som ein uavhengig stat med territorielle ambisjonar, utgjer ein enorm fare for heile Eurasia, og, utan å løyse det ukrainske problemet, er det meiningslaust å snakke om kontinental politikk, skriv han i boka ifølgje CBS.