– Eg syntest det var veldig overraskande å møte på denne her. Litt skummelt også. Eg vil jo helst ikkje få denne på kroppen, seier Rune Ribe.
På søndagstur på Brekkestø på Justøya gjorde han ein uvanleg observasjon.
Ribe såg ein Pelagia noctiluca, eller «lysmanet», ein art som vanlegvis lever i tropiske havområde.
Her, like utenfor Lillesand, ble den sjeldne maneten observert søndag formiddag.
Ribe fortel at han kjende att den uvanlege maneta med ein gong.
– Ho er veldig lett å kjenne att på dei litt kraftige tentaklane som heng under.
Ribe har sett manetarten fleire gongar i varmare land, men fortel at det er første gong han har observert han i Noreg.
Ein sjeldan gjest
Lysmaneter lever vanlegvis i varme havområde som Middelhavet, Raudehavet og Det indiske hav.
Namnet kjem av at arten er i stand til å produsere biologisk lys.
Maneta har nesleceller, eller giftceller, både på tentaklane og oppe på klokka.
Ifølgje forskar Tone Falkenhaug ved Havforskingsinstituttet er gifta til denne maneta relativt sterk, og kontakt med henne kan gje smertefull svie.
Forskar ved havfoskingsinstituttet, Tone Falkenhaug, fortel at varme havstraumar innimellom kan føre lysmaneter til norskekysten.
Foto: Erlend Astad Lorentzen / Erlend Astad Lorentzen / HavforskningsinstituttetForskaren fortel at det ikkje er ofte dei ser denne arten langs norskekysten, men at det hender sporadisk at det kjem enkeltindivid hit med varme havstraumar.
– Dette er ein relativt sjeldan gjest hos oss, stadfestar ho.
Tidlegare i haust har Havforskingsinstituttet fått melding om to observasjonar på Sørlandet.
Pelagia noctiluca høyrer til nesledyra. Desse bruker giftige nesleceller til å lamme og drepe bytedyra sine. For menneske kan gifta i desse cellene gje skarp svie.
Foto: Rune Ribe / PrivatSkaper problem
Sjølv om lysmaneter som hovudregel ikkje finst i Noreg, kan dei ifølgje forskaren skape store utfordringar i varmare land.
– I Middelhavet har lysmanet vore eit stort økonomisk problem for turistnæringa. Strender har vore nøydde til å stenge fleire gonger, seier ho.
Falkenhaug fortel at lysmanet også kan skape problem for oppdrettsnæringa, dersom dei førekjem i store mengder.
Ønskjer registrering
Her heime har forskaren eit ønskje til dei som ser uvanlege maneter langs norskekysten.
–Eg vil oppmode alle om å registrere observasjonar av maneter i «Dugnad for Havet».
www.dugnadforhavet.no er Havforskingsinstituttet sin folkeforskingsportal. Der kan ein registrere sjeldne maneter, og det er mogleg å stille spørsmål til forskarane.
