– Det var ei krevjande tid fordi det kunne ha vore løyst på ein mykje smidigare måte. Men resultatet vart som det vart, og det er eg nøgd med, seier Pedersen til NRK.
23. desember skreiv Pedersen under ei treårskontrakt med Start. Men vegen fram til signaturen var på plass var lang.
Pedersen førte Jerv til kvalifiseringsplass der dei tapte den siste og avgjerande kampen mot Start på Sør Arena.
– Skapte unødvendig mykje støy
Etter spekulasjonar i mediene om ein overgang til Start, sende FK Jerv ut ei pressemelding 5. desember.
Der gjekk det fram at Jerv i eit ekstraordinært styremøte hadde konkludert med at det var uaktuelt å sleppe Pedersen til naboen i vest.
– Ballen er død. Pedersen har kontrakt med Jerv. Pedersen er trenar for FK Jerv i 2016, sa styreleiar i Jerv, Per Gunnar Topland til Agderposten.
Søndag opnar Start eliteseriesesongen med Steinar Pedersen på sidelinja. Start-trenaren har sjølvsagt ikkje gløymt avskjeden med Jerv.
– Det var ein situasjon som vart handtert på ein måte som skapte unødvendig mykje støy, seier Pedersen.
Det er ikkje Topland i FK Jerv einig i.
– Det har eg ingen kommentar til utover at vi har veldig god samvittigheit i den prosessen, seier Topland.
Hylla av Jerv-fansen
Då Pedersen møtte gamleklubben i treningskamp Sørlandshallen i vinter vart Start-trenaren hylla av dei frammøtte Jerv-supportarane i «Svaberget».
– Det var ein gest eg set veldig stor pris på. Svaberget er ei lita, men ekstra dedikert supportargruppe som voks seg større og større gjennom perioden i Jerv.
– Det er supportarar som verkeleg brenn for klubben. Måten dei takka meg på i Sørlandshallen sette eg veldig stor pris på, seier Pedersen.
Stor skilnad på klubbane
Pedersen vedgår at det er stor skilnad på å vere trenar i Start samanlikna med 1. divisjonsklubben Jerv.
– Alt er større. Det er meir fokus på ein sjøl som person og trenar. Det er meir fokus på laget, seier han.
– I Grimstad fekk eg lov til å jobbe litt i fred og teste ut meg sjølv. Eg hadde ei veldig lojal spelagruppe som tok steg gradvis. Det håpar eg vi skal sørge for at skjer her i Start også. Så langt har gruppa vore fanstistiske. Dei jobbar hardt, dei har teke nye idear. Det er mange gode fotballspelarar her, seier Pedersen.