– Mange av dei same ansikta har vi sett dagleg i mange månader. Det gjer nok med at vi får større sympati fordi vi kjenner dei att, seier fungerande domprost i Kristiansand, Aud Smedmo til NRK.no.
Smedmo er i tillegg leiar av ressursgruppa som jobbar med tiggarproblematikken i sørlandsbyen.
Hærverk og trugslar
31. august i år opna den såkalla tiggarbrakka med sanitæranlegg, som tiggarane kan nytte. Kort tid etter opninga vart tiggarar utsett for trugslar og det vart gjort hærverk på brakka.
– Det skjedde noko etter det. Eg trur fleire som har halde seg ganske passive i tiggarproblematikken meir prega av sympati, seier Smedmo.
- LES: Folk om tiggerbrakke
Domprosten trur ikkje at dette kan føre til at fleire tiggarar kjem til Kristiansand.
– Dei som kjenner problematikken aller best seier at tiggarmarknaden i Kristiansand er metta og har ikkje tru på at det vil komme særleg fleire enn dei som er komme allereie, seier ho.
– Ein del gir oss råd
Hos Frelsesarmeen møter NRK.no Bobby og Lorry frå Romania. Dei deltek i føremiddagsandakta saman med andre tiggarar og flyktningar.
– Folk viser meir sympati, seier Bobby.
– Det er skilnad. Nokon viser sympati, andre ikkje. Ein del kjem bort og gir oss råd og hjelper oss med ulike ting, seier Lorry.
Kari Klingsheim jobbar som diakon hos Frelsesarmeen og har blitt kjend med mange av tiggarane. Også ho meiner at sympatien til tiggarane er større enn tidlegare.
– Det kjem stadig menneske som gjerne vil støtte med både klede og mat og dei spør kva dei kan gjere, seier ho til NRK.no.
– Forferdeleg
– Det har vore skrive mykje flott om tiggarane i media også. Folk ser kva kommunen gjer for dei og eg trur at det vil vere med på å gjere folk meir bevisst, seier Klingsheim.
Ho trur også at hærverket på tiggarbrakka har sitt å seie.
– Mange menneske tykkjer det er forferdeleg at dei ikkje let dei vere i fred, seier ho.