2014 vart det varmaste året i Noreg sidan målingane byrja, temperaturen låg 2,3 grader over normalen. Og Sola hadde den høgaste middeltemperaturen i heile landet, med over ti grader.
– Det ser ut som at me har fått eit vêromslag, og at våren kjem tidlegare og tidlegare. Då er me som bønder villige til å gambla litt med å så tidleg, seier Kåre Wiig i Miljøgartneriet.
Det er grønt gras på jorda på Jæren, og om nokre få veker skal sommarkålen i jorda. Inntil då held dei hus inne i drivhuset.
– Dei er under tak, og me må nok venta ein fem-seks veker før me set dei ut. Me håpar på at våren skal koma, og at me ikkje får tilbakeslag.
Wiig kan nesten garantera at årets første sommarkål frå Jæren er i butikkane den 10. mai.
– Det er naturleg at kystområda får dei høgste temperaturane, fordi dei får generelt milde vintrar. Når dei i tillegg får veldig varme somrar, då blir det veldig høge temperaturar, seier Stein Kristiansen ved Meteorologisk institutt.