Den første velten skjedde på Karmsund bru på E134 litt før klokka 10 måndag. Den andre på Boknasund bru litt før klokka 11.30. Begge bruene blei heilt stengde.
På Boknasund bru på E39 låg campingvogna framleis i vegen i 12-tida. Her er det ikkje omkøyringsmoglegheiter, og køane blei lange i dei to timane brua var heilt stengd.
Dei to hendingane fekk politiet til å gå ut med følgjande åtvaring:
– Politiet anbefaler at bilar med campingvogn og campingbilar tar dagen med ro og ikkje køyrer. Det bles kraftig, og vinden held fram utover dagen, er den klare meldinga frå Sør-Vest politidistrikt.
Oppmodinga gjeld òg bilar med tilhengar.
Barn og vaksen til legevakt
Ifølgje Tore Frøyland-Jensen, politiet sin innsatsleiar ved Karmsund bru, var vinden måndag føremiddag svært sterk.
– Det bles mykje frå nordvest, ein ugunstig retning for nokre av bruene. Det kan vere fare for at også andre ting veltar, seier han.
Redningsskøyta opplyste til politiet at vindstyrken var 24 meter i sekundet.
– Men oppe på brua er vinden sterkare, seier innsatsleiaren.
Då vogna på Karmsund bru velta, trefte ho ein annan bil på brua. Føraren av bilen og ein passasjer, eit barn, fekk ein del glas over seg. Dei verka uskadde, men er sende til legevakta for sjekk, ifølgje politiet.
I velten fekk campingvogna skader og blei hengande i rekkverket på brua. Det gjorde politiet bekymra for at det kunne falle ting frå brua og ned i sjøen.
Og klokka 12.30 skjedde det:
– Vogna er sikra, men vi ventar med berging til vinden løyar. Det kan ta litt tid, seier Frøyland-Jensen.
Stoppa båttrafikken
– Status per nå er at vi med hjelp frå Kystradioen og 110 har fått stansa båttrafikken i området, skreiv operasjonssentralen på Twitter litt etter klokka 10.
Ei redningsskøyte låg i sjøen under brua for å halde båttrafikk unna.
Medan brua på E134 er stengd, kan bilistar køyre via Karmøytunnelen. Naudetatane dirigerer trafikken. Karmsund bru ligg utanfor Haugesund, og går mellom øy- og fastlandsdelen av Karmøy kommune.
På Boknasund bru køyrde føraren vekk frå brua etter at velten skjedde. Ingen er skadde i hendinga. Boknasund bru er ein del av E39, og bind saman Austre og Vestre Bokn i Bokn kommune.