Herleg humor og prisvinnande drama: Slik blir NRK-hausten

– Eg er stolt over menyen NRK byr på denne hausten. Dette blir eit halvår fylt av god underhaldning, spennande drama og viktige samfunnsmessige hendingar som kommunestyre- og fylkestingsvalet. I NRK kjenner vi alltid litt ekstra på oppgåva med å skulle sette folk i stand til å delta i demokratiet, seier kringkastingssjef Vibeke Fürst Haugen, før ho held fram:

– Samtidig skal vi le av det som er både jubileum og siste sesong av Side om side, få skråblikk på nyheitsbildet med ny fast paneldeltakar i Nytt på nytt og ikkje minst heie fram fantastiske songarar når Stjernekamp endeleg er tilbake. Vi markerer også folkemusikkens år ved å sende ein heilt ny TV-serie som følger fem unge folkemusikk-utøvarar. Det er berre å glede seg, seier kringkastingssjef Haugen.

Humor

Hva skjedde med Solveig?

Hva skjedde med Solveig er ein dokukrim-komedie med Kevin Vågenes i heile 17 roller. Serien følgjer eit journalistteam som etterforskar det mystiske dødsfallet til Solveig Lyngåsen. Den populære bloggaren Solveig blir angripe og dytta utfor ei klippe under ein skogstur, og mistanken fell på Ole Glen, ein notorisk kriminell. Men utan bevis, blir saka lagd bort. Kven elles i bygda hadde motiv for å drepe Solveig?

Serien byr på humor og spenning med komiske rekonstruksjonar og absurde intervju.

• Premiere fredag 18. august
• Kontakt: Janina Mosti

Hybris

Kor mykje er du villig til å lyge for at folk skal oppfatte deg som eit godt menneske? I krim-humorserien Hybris møter vi Marius og vennene hans på jakt etter sanninga om ein fatal kveld – dei må nøste opp kva som eigentleg skjedde, og hemmelegheit etter hemmelegheit blir avslørt.

• Premiere i september
• Kontakt: pressevakt@nrk.no

Vettskremt

I løpet av seks episodar skal programleiarane Erik Solbakken og Annika Momrak gjere sitt beste for å skremme deltakarane, samtidig som dei sjekkar kven som får høgast utslag på pulsen. Deltakarane som er dårlegast til å behalde roa, må forlate huset i tur og orden, heilt til berre den sindigaste kjendisen står igjen som vinnar av Vettskremt.

• Premiere i september
• Kontakt: Linda Reistad

Dummedag

Dummedag er ein postapokalyptisk, dramatisk komedie. Når eit nytt virus muterer og skaper ein dødeleg pandemi, blir seks framande tvinga til å jobbe saman for å redde verda frå eit virus som gjer folk dumme. Vil dei overleve? Og kan desse seks personane verkeleg vere framtida til menneskeslekta?

I rollene møter vi Jakob Schøyen Andersen, Henrik Mestad, Charlotte Frogner, Cengiz Al, Kristine Grændsen og Elli Mulmer Osborne.

• Premiere i november
• Kontakt: Vetle Nielsen

Helt Ramme sporter, sesong 2

Helt Ramme sporter er tilbake med nye, heilsprø idrettar frå heile verda! Denne sesongen har Nicolay Ramm drege med seg dei modige kjendisane Mikkel Niva, Christina Vukicevic, Oskar Westerlin og Cengiz Al ut på eventyr for å konkurrere i nokre av dei raraste sportane på kloden. Det blir gloheitt, iskaldt, vondt... og farleg!

• Premiere fredag 27. oktober
• Kontakt: Vetle Nielsen

Førstemann

Martin Lepperød er programleiar for Førstemann, ein leiken konkurransereality. På ein idyllisk gard bur og lever seks komikarar, samtidig som dei konkurrer om å vere best til å vere først.

• Premiere i november
• Kontakt: Lene Mykjåland

Side om side, siste sesong

Siste sesong av sjåarfavoritten Side om side vil skildre det etter kvart så kjende nabolaget på Granli. Livet går vidare, og bebuarane i nabolaget held fram med å rote det til for seg sjølv og andre.

Etter 10 sesongar og totalt 100 episodar blir den siste sesongen eit verdig punktum for historia om venner, fiendar og familiar – med store dosar forviklingar og kjærleik.

• Premiere laurdag 26. august
• Kontakt: Janina Mosti

The Flatshare

Tiffany og Leon er to framande som begge har låg lønn og dårleg råd. Leigeprisane i London er høge. Dei kjem på den geniale idéen om å dele kostnadene ved å dele seng! Den eine jobbar dagtid, mens den andre jobbar om natta. Dei har aldri møtt kvarandre, og viss alt går som planlagt, vil dei aldri gjere det heller. Men snart begynner paret å leggje igjen post-it-lappar til kvarandre, og dei blir dregne inn i dei rotete, komplekse liva til kvarandre.

• Premiere i september
• Kontakt: Janina Mosti

Drama

Makta

Året er 1974, men vi er likevel i Oslo anno 2023. Arbeidarpartiet er i krise. Partiet blir riven i stykke av ein konflikt mellom partileiar Reiulf Steen og statsminister Odvar Nordli. Alkoholen flyt, lekkasjane likeså. Samtidig blir den sosialt engasjerte legen Gro Harlem Brundtland vikla inn i det politiske maktspelet. Ho blir etter kvart ein meisterleg spelar og utmanøvrerer motstandarane sine. I 1981 blir ho Noregs første kvinnelege statsminister.

Tidlegare i vår vann Makta pris for blant anna beste drama på prestisjetunge Canneseries. I hovudrollene møter vi mellom anna: Kathrine Thorborg Johansen, Jan Gunnar Røise, Anders Baasmo, Øyvind Brandtzæg, Trond Espen Seim, Manish Sharma og Nader Khademi.

• Premiere i oktober
• Kontakt: Heidi Gjestad Frogg

Norsk-ish 2

Det har gått to år sidan Fariba, Amrit og Helin stod i den etter kvart velkjende identitetsspagaten mellom to kulturar i den kritikarroste sjåarsuksessen Norsk-ish. Vennskap, familierelasjonar og kjærleiksforhold står framleis i sentrum når serien no er tilbake med ein sesong 2. Fariba, Helin og Amrit er opptekne på kvar sin kant, heilt til ein stor tragedie i livet til Helin samlar gjengen igjen.

• Premiere i september
• Kontakt: Linda Reistad

VGS 2

I haust ventar 26 nye episodar med Jakob, Amir, Lara, Amalie, Mathias og dei andre i VGS-serien. Det blir meir drama, mykje humor og litt mørkare konfliktar. Revy, sex, rasisme, psykisk helse og kjærleik er nokre av stikkorda for gjengen på Eikebro.

Premiere: 1. september
Kontakt: Heidi Gjestad Frogg

Malpractice

Den respekterte Dr. Lucinda Edwards mister ein pasient på grunn av ein overdose. Det blir det sett i gang ei etterforsking som granskar åtferda hennar den natta. Var hendinga uunngåeleg? Malpractice er ein britisk spenningsthriller om ein lege fanga i ein konspirasjon.

• Premiere tysdag 14. august
• Kontakt: Janina Mosti

Babylon Berlin, siste sesong

Fjerde og siste sesong av den tyske suksess-serien Babylon Berlin kjem på NRK i haust. Denne sesongen går føre seg i 1930-talets Berlin, like etter at dei glade 20-åra kulminerte i det globale børskrakket og den store depresjonen – og marsjen til nazistane mot makta er i full gang.

• Premiere i løpet av hausten
• Kontakt: Janina Mosti

Lik meg, siste sesong

Lik meg har følgt 06-kullet frå slutten av barneskulen. No begynner dei straks på vidaregåande. Framtida er uoversiktleg og skremmande, og barndommen kjennest veldig lenge sidan. Russetida, framtida, kjærleiken og vennskapane – alt står på spel samtidig, og midt oppe i dette skal dei ta omsyn til skulearbeid, familien, ei kaotisk verd og aller mest: seg sjølv i stormande utvikling.

• Premiere i november
• Kontakt: Heidi Gjestad Frogg

Kultur

Portrettmesterskapet

I Portrettmesterskapet skal ei mangfaldig gruppe med kunstnarar, både sjølvlærte og profesjonelle, portrettere kjende profilar. På berre fire timar skal kunstnarane skape eit best mogleg portrett av modellen sin.

Kanskje klarer dei å framstille nye sider ved ansikta vi allereie kjenner så godt – anten dei bruker akryl, olje, kolstift eller sprayboks. Til slutt vil det stå igjen ein person som er vinnaren av Portrettmesterskapet 2023. Programleiar er Mikkel Niva.

• Premiere torsdag 14. september
• Kontakt: Nan Kristin Myhre

Arven: Historien om norsk folkemusikk

Her blir vi kjende med mystikk, tradisjon, rebellar og suksessar i den overraskande og mangslungne folkemusikk-historia. Norsk folkemusikk har aldri engasjert fleire unge utøvarar enn akkurat no. Titusenvis speler rundt i Noreg, og kvart år reiser hundrevis av håpefulle til kappleik for å kjempe om prisar i spel, song og dans. NRK har følgt fem unge utøvarar som drøymer om å vinne prisar, føre den sårbare tradisjonen vidare og å finne ein leveveg.

• Premiere i november
• Kontakt: pressevakt@nrk.no

Dokumentar

Jakten på monsterkveita

Bård Tufte Johansen og fiskekompis Lars Lenth buset seg i ein aude fjord på Sørøya i Finnmark for å realisere ein gammal draum: Å få ei kveite på over hundre kilo på kroken. Dei har ein romantisk idé om at dei vil leve av det dei fangar og sankar i havet og på land, men gradvis skjønner dei to bygutane at dei har overvurdert eigne evner – både til å leve eit enkelt liv i pakt med naturen, og til å overliste monsterkveita.

• Premiere fredag 1. september
• Kontakt: Nan Kristin Myhre

Bamsegutt

Tore Strømøy jobbar igjen med ei sak om dei svakaste i samfunnet. Eit rop om hjelp frå Søraust-Asia fører han til møte med NAV, utanriksteneste og barnevern. Kvifor ingen vil hjelpe mannen som blir kalla Bamsegutt heim til Noreg? Det skal vise seg at saka blir den tyngste Tore nokon gong har jobba med.

• Premiere i november
• Kontakt: Nan Kristin Myhre

Tandemeventyret

Ti deltakarar med ulike funksjonsutfordringar syklar frå Lindesnes til Nordkapp på doble tandemsyklar. Prosjektet Tandemeventyret starta som ein vill idé, men endar opp som ei unik og inspirerande reise. Gjennom 2500 kilometer med spektakulær natur og både fysiske og mentale utfordringar, opplever deltakarane samhald og meistring. TV-teamet fekk vere med for å dokumentere reisa, men gruppa har sjølv organisert turen, og ingenting av det som skjer er regissert.

• Premiere i september
• Kontakt: Helene Amlie

Familien Adampour, sesong 2

Familien Adampour er tilbake med ny sesong. Dei fire søstrene Lina, Mina, Diana og Sofia er suksessrike på kvar sin kant, men slit med forholdet seg imellom. Kan familieterapi bli ein siste utveg? Lina som trur ho er godt gift med Aqueel, viser seg å kanskje ikkje vere det likevel. Og Diana ber på ein løyndom ho gruer seg til å dele.

• Premiere i oktober
• Kontakt: pressevakt@nrk.no

Ny dokumentarserie med Noman Mubashir

I ein personleg dokumentarserie utforskar Noman Mubashir hat-kjensla i Noreg i 2023. Med utgangspunkt i si eiga historie som trippelminoritet (norsk-pakistanar, homofil og muslim) ser han nærare på korleis ulike minoritetar får hets og hat, og kva det gjer med oss. Er det sider ved samfunnsdebatten i dag som gir auka grobotn for hat? Korleis kan vi i så fall jobbe mot det? I serien går Noman ut av rolla som journalist og inn i det som blir ein reise ut av komfortsona og inn i det mest sårbare, nemleg å skulle stå trygt i kven ein er.

• Premiere i november/desember
• Kontakt: pressevakt@nrk.no

For barn

Husky

På garden «Husky Adventure» i Karasjok lever Elle og mor Line av hundespannturisme – eit fredeleg liv i det iskalde landskapet. Brått blir kvardagen snudd på hovudet. Ein gjeng brutale hundesmuglarar bryt seg inn i hundegarden og ranar med seg nesten alle hundane. Elle og mora er i sjokk. Kva skal skje med garden no?

I ei verd der dei vaksne ikkje er til å stole på, tek Elle og vennene Aslat og Jovnna opp jakta på hundesmuglarane og viklar seg inn i eit kaos av intrigar, løgn, vondskap og bedrageri. Husky er ein spenningsserie for heile familien.

• Premiere i oktober
• Kontakt: Heidi Gjestad Frogg

BlimE!

I år er BlimE-dagen fredag 22. september. Martin Lilleberg syng årets BlimE-låt, «Sveve høyt». Låten inspirerer til fellesskap, draumar og dans. Den handlar om at alle personar tel og betyr noko. Sjå etter det fine rundt deg, i andre og i deg sjølv. Det du ser etter, finn du. Drøym stort, leik fritt og svev høgt! Med årets BlimE-låt er målet at kvar og ein forstår kor viktige dei er. Alle kan bidra på sin måte med det dei kan, og til saman kan ein få til alt.

• Kontakt: Heidi Gjestad Frogg

Maks gass

Morten og Saft er tilbake på vegen med ein rykande fersk og gummisvidd sesong av Maks gass! Gjennom fem episodar besøker Morten råbarske jenter og gutar som er superproffe i kvar si motorgrein. Morten hamnar fort på djupt vatn eller to hjul i eit forsøk på å halde tritt med barna, medan Saft bruker tida på å finne på heilt nye rampestrekar. Fest bilbeltet, og bli med på ei reise med Noregs tøffaste barne-TV!

Labyrint

Daidalos har igjen utfordra barn til å konkurrere mot han i Labyrintverden, og over 13 000 barn frå heile landet melde seg! Åtte lag får møte sin store erkefiende, robotane hans og hans like kamplystne søster Daidalosa. Vil barna sigre, eller blir dei slima ut av Labyrinten?

• Premiere i oktober
• Kontakt: Heidi Gjestad Frogg

Kommune- og fylkesvalet 2023

Måndag 11. september er det kommunestyre- og fylkestingsval i Noreg. NRK arrangerer valsendingar frå dei største byane våre og inviterer gjester og publikum inn i studio gjennom heile valkampen.

Partileiarane skal også i elden sjølv om dette er eit lokalval. NRK opnar i Arendal med alle toppane til stades, før valkampen blir avrunda i Stavanger med appellar og valkamp-innspurt. I Tromsø skal publikum spele hovudrolla når NRK inviterer til folkemøte der politikarane må svare veljarane på direkten.

Valomat og lokalvalguide

Som vanleg kan veljarane også få hjelp til å finne ut av kva parti dei burde stemme på med NRKs valomat. Nytt av året er at NRK også lanserer lokalvalguiden. Dette er ei heilt ny teneste som består av i alt 357 ulike guidar - ein for kvar kommune. Her vil veljarar kunne lese seg opp på sin eigen kommune og sjå kva saker som er mest aktuelle på deira heimstad.

• Ta Lokalvalguiden her
• Ta Valomaten her

Kontakt: Vetle Nielsen

Historier og underhaldning rett i øyret

Til hausten kjem det også ei rekke nye podkastar, og dei gode lyttaropplevingane står i kø. Her er nokre av historiene du kan høyre:

Hele historien: Grottefesten

Ein gutegjeng som kallar seg Direktoratet for rusmisbrukere bryt seg inn i eit avstengt bomberom i Oslo for å arrangere eit raveparty midt under pandemien. 22 år gamle Magnus blir med på festen i siste liten. Han veit ikkje at to straumaggregat er plasserte i grotta. Dei produserer dødeleg kolosgass. Ein etter ein svimar av, og hundrevis av festdeltakarar er sette i livsfare.

Hele historien: Hvalrossen Freya

14. august vart ein 600 kilos kjendis skoten i Frognerkilen i Oslo. Nokre hektiske månader i søkelyset til media enda tragisk for kvalrossen Freya. Frå ho vart oppdaga på Østfoldkysten i april, var ho stadig i rampelyset. Ho gnog sund gummibåtar, begeistra badegjester og drap svaner. Då ho vart avliva, gjekk nyheita verda rundt i sommarstille nyheitsredaksjonar. Mange rasa mot dei som vedtok avlivinga, andre var skuffa over alle dei som oppsøkte Freya og skapte farlege situasjonar.
Premiere: 14. august

Hele historien: Skitbyen

Berit Hafsmo har levd livet sitt rundt fattigdomsgrensa, men er eit optimistisk fyrtårn. Etter årevis med elendig økonomi og endå verre bustader, flyttar ho til Skitbyen, til ein gammal tenestebustad for Trondheims dotømmarar. Her skaper ho ein trygg base for slekt og venner med dårleg råd. Men så kjem varsel om utkasting.

Regissør Ole Martin Hafsmo har laga ein hjartevarm podkastserie om mor si, Berit.

Premiere: 13. september

Radio Utslagsnes

I over 10 år har Rune Nilson introdusert NRKs radiolyttarar for utallige karaktarar og figurar med påstått samiske Jan Olsen og skarvehattgründer Ståle Utslagsnes i spissen. No når Ståle startar sin eigen Radio Utslagsnes, blir heile gjengen samla på ein stad. Alt saman blir administrert av Rune sjølv og publisert som ein eigen podkast i august. Vi lovar ein radiokanal og podkast heilt ulikt noko anna du har høyrt før!
Premiere: 23. august

Kontakt alle podkastar: Pressevakt

Underhaldning

NRKs store underhaldningsflaggskip er tilbake til hausten. Dei første ti laurdagane får vi Stjernekamp, før Maskorama tek over om lag i midten av november.

Kontakt:

• Stjernekamp: Helene Amlie
• Maskorama: Janina Mosti og Vetle Nielsen
• Nytt på nytt, Lindmo, Beat for beat: pressevakt@nrk.no

Verdsmeisterskapa i haust

Fotball-VM

Dei norske fotballjentene er endå ein gong kvalifiserte til verdsmeisterskapet i fotball. Denne gongen er dei beste landslaga samla i Australia og New Zealand. Hege Riises tropp skal møte Sveits, debutantane Filippinene og vertsnasjonen New Zealand. Med stjernespelarar som Ada Hegerberg, Caroline Graham Hansen og Guro Reiten i stallen, er det forventningar om at Noreg reiser seg etter det skuffande europameisterskapet i fjor.

Denne gongen kan sjåarane følgje VM på NRK og Viaplay. Meisterskapet går føre seg frå 20. juli til 20. august. Noreg er først ut og speler den aller første kampen i meisterskapet – mot New Zealand.

VM i friidrett

Dei beste friidrettsutøvarane i verda tek turen til Budapest for å kjempe om VM-medaljar. Dette er det store målet i år for norske stjerner som Jakob Ingebrigtsen, Karsten Warholm, Karoline Bjerkeli Grøvdal og Eivind Henriksen.

NRK stiller med ein sterk mannskap for å gi sjåarane alle dei store augneblinkane frå meisterskapet. Jann Post, Vebjørn Rodal og Christina Vukicevic Demidov er kommentatorar. Du kan følgje alle dei norske håpa på NRK1 og på radiokanalen NRK Sport.

VM i friidrett går føre seg frå 19. august til 27. august. Les meir om VM i friidrett på NRK her.

• Kontakt: Vetle Nielsen

Atterhald: Alle premieredatoar kan bli endra.