Giske erstattar Kings Bay-leiar med ein av sine eigne

Oppdatert: Trond Giske setter likevel ikke inn Hill-Marta Solberg som erstatter for nåværende styreleder Knut Ore.

Trond Giske har tidlegare vorte sterkt kritisert for å utnemna sine eigne til viktige styreverv.

Utskiftinga av sitjande styreleiar Knut Ore i det statlege selskapet Kings Bay AS skjer til store protestar frå styret og direktøren, i eit år der det ikkje er val av nytt styre.

Svært overraskande, meiner nestleiar i styret, Pål Prestrud.

– Eg blei ganske forundra fordi dette er midt i ein toårsperiode. Han blei oppnemnd for eitt år sidan, så det kom overraskande på at dette skjer etter eitt år. Det kom som eit lyn frå klar himmel, seier han.

• LES OGSÅ: Giske sitt privelegium å bestemma

Vil gje vervet til tidlegare partifelle

Kings Bay er eit statleg selskap for forsking og miljøovervaking på Svalbard. Selskapet driv den internasjonale forskingsbyen i Ny-Ålesund, som mellom anna leverer informasjon til FN sitt klimapanel.

Knut Ore har sete som styreleiar i det statseigde selskapet Kings Bay i 11 år.

Etter det NRK har grunn til å tru, kjem eigaren, Næringsdepartementet, til å kasta Ore under dagens generalforsamling.

Ap-statsråd Giske vil i staden setja inn tidlegare Ap-nestleiar (1992-2007) Hill-Marta Solberg i det godt betalte styrevervet i Kings Bay - 117.500 kroner i årleg honorar.

Beskjeden kom like uventa på styreleiaren sjølv som på resten av styremedlemmene. Han fekk beskjeden om at han får sparken ei knapp veke før dagens generalforsamling.

– Eg fekk for kort tid sidan beskjed om at departementet ønskjer seg ein ny styreleiar. Det hadde eg ikkje venta, det kom overraskande på meg, seier Ore til NRK.

– Ore har gjort ein kjempejobb

Næringsminister Giske ønskte måndag ikkje å kommentera denne saka. I ein e-post får NRK følgjande svar frå departementet:

«Valgene til styrene finner vanligvis sted for en periode på to år, i samsvar med aksjelovens hovedregel. Departementet foretar en løpende vurdering av styrets arbeid, kompetanse og utfordringer, og utskiftinger utenom perioden vil derfor forekomme».

NRK har vore i kontakt med samtlege styremedlemmer, ingen av dei kan forstå kvifor departementet vil byta ut styreleiar Ore.

Dårleg behandling av ein dyktig leiar, meiner styremedlem Kirsten Borch Mathisen.

– Eg blir veldig overraska. Knut Ore har gjort ein kjempejobb for styret. Under hans leiing har me sett i gang store prosjekt i Kings Bay: marinlaboratoriet, oppussinga av Amundsen-villaen og gjennomføringa av NY-Ålesund-symposium, som var ein stor jobb som Ore hausta mykje skryt for, fortel Mathisen.

• Her kan du lesa meir om Kings Bay og Ny-Ålesund