– Eg er så lei meg for at vi ikkje klarte å få dette til i kveld, seier Morten Harket i ein video på Instagram laurdag ettermiddag.
Bandet informerte laurdag om at konserten i Oslo Spektrum laurdag kveld var avlyst.
– Vi er lei oss for å måtte informere om at vi må avlyse konserten i kveld fordi Morten har blitt diagnostisert med halsbetennelse og må roe ned stemma, skriv bandet på Instagram.ans
På grunn av pandemien har denne konserten vore utsett i to år, og mange tusen publikummarar hadde gleda seg til å sjå popheltane på scena igjen.
Magne Furuholmen fortel på Instagram at det er andre gongen på 40 år at han har vore nøydd til å avlyse ein konsert.
– Men det hjelper ikkje deg som hadde billettar til i kveld, særleg dei som har reist langt for å kome til oss, skriv Furuholmen.
Han forsikrar om at Paal Waaktaar-Savoy og han var klare for konserten.
– No druknar vi sorgene våre bak scena med for mykje øl. Det hjelper ikkje, men kva skal eg gjere, spør Furuholmen.
Blant dei som hadde reist langt for å sjå A-ha, er Elen Siglen og Kristin Klette frå Bergen. Saman med venninnegjengen var dei klar ei etterlengta konsertoppleving.
– Vi blei veldig lei oss, dette var veldig synd. Vi hadde gleda oss kjempelenge, fortel Elen og Kristin.
Dei hadde planlagt jenteturen lenge, og trur nok dei uansett skal få ei fin helg i Oslo.
– Men A-ha-konserten skulle vere krona på verket.
Den første konserten fredag kveld, var ein stor suksess, blant anna med full allsong på «Hunting High and Low».
– Vær så snill å hold på billettane dykkar. Vi vil kome med meir informasjon så raskt som råd er, skriv bandet på Instagram.
Fans frå heile Europa har tatt turen til Oslo for å sjå A-ha denne helga, og mange av dei fekk sjå bandet live fredag kveld.
Men likevel var det ein tøff beskjed å få at Morten Harket har fått halsbetennelse.
– Men vi kan jo ikkje gardere oss mot sjukdom, men det er klart, eg er jo litt skuffa, seier Jennifer MacFarland frå London.
A-ha sin manager, Harald Wiik, skriv i ein e-post til NRK at dei i første omgang prøver å finne ein ny konsertdato.
– Dersom det ikkje er mogleg, vil billettane bli refundert. Det blir også mogleg å få refundert billetten dersom du ikkje ønskjer billett til ny konsert, skriv Wiik.