Hopp til innhold

Tämmöinen oon tämän vuođen Vesisaaren kväänifestivaali

Vesisaaren kväänifestivaali järjestethään ensi viikola, ja se aloittaa kans vuođen kväänifestivaalikesän. Festivaalijohtaaja Raymond Olufsen luppaa fiinin, viisi päivää kestävän kulttuurielämyksen pyblikymile. – Mie olen tilanu hyvän sään ja mie uskon, ette kaikki tulhaan nauttimhaan meiđän festivaalista.

Kvenfestivalen også for barn

Kväänifestivaali järjestethiin ensimäisen kerran vuona 2019.

Foto: Anne Mari Rahkonen Berg / NRK

Ennää yksi viikko jäljelä siihen, ette Norjan oma kväänifestivaalikesä oon viralisesti käynissä. Niin ko joka vuosi, aloittaa Vesisaaren oma kväänifestivaali, Kvenfestivalen – Kväänifestivaali, tämän festivaalikauđen, jota hiljemin tullee jatkamhaan muun muassa Paaskiviikko ja Kirpparifestivaali.

Vesisaaren Kväänifestivaalin johtaaja Raymond Olufsen oon valmis pistämhään kauđen käynthiin, ja ođottaa fiinii, kulttuurin täytteistä festivaalikessää.

– Mie oon niin lykylinen, ette mie saatan aloittaat kväänifestivaalikesän.Tämä oon kans ensimäinen vuosi, ko mie saatan kans olla myötä muila kväänifestivaaliila.

Kvenfestivalen – Kväänifestivaali oon yhtheistyöprosjekti Vesisaaren museumin, Utleieservice Nord AS:n, Varankin kvääniseuran, Vesisaaren kväänin kielisentterin, Vesisaaren histoorialaajin ja Vesisaaren biblioteekin välilä.

– Se oon paljon juoksuu viikko ennen festivaalii. Mutta met tulema saamhaan kaikki valmhiiksi keskiviikoksi, luppaa festivaalijohtaaja.

Tämmöinen oon Kväänifestivaali 2022

Kahđen vuođen jälkhiin koronapandemian kans saattaa Kväänifestivaali vihhoin ottaat takaisin sen vakituisen aijankohđan, juunikuun ensimäisen viikon. Se kans meinaa, ette pyblikymi saa taas nauttii viisi päivää programista, joka keskittyy kväänin ja norjansuomalaisheen kulttuurin Varengissa.

Festivaalin aukaissee keskiviikkona Marit Magelssen Vambheim, styyrijohtaaja Heia Vesisaaresta, joka oon yksi festivaalile avustusta antanu järjestö.

– Lisäksi met olema kans saanu avustusta Tromssan ja Finmarkun fylkiltä ja Kulturrådetilta, sannoo Olufsen.

Tuorestai alkkaa Vesisaaren oman kväänipodkastin, Quæancastenin, suorala premiäärilähätykselä. Se oon ensimäinen kerta, ko tämä podkast lähätethään suorana niin kuvan ette äänen kans. Lähätyksen programijohtaaja oon Jitse Jonathan Buitnik, joka kuttuu myötä studihoon vierhaita praatthaaman hänen kans.

Päivä jatkuu lähätyksen jälkhiin muun muassa Bente Nordhagenin fotonäyttelyllä Jakob Mikkelsenin konsertilla.

Lisbeth R. Dragnes, Varanger museum og Raymond Olufsen, daglig leder Vadsø kvenske språksenter

Se oon festivaalijohtaaja Raymond Olufsen ja museumin Lisbeth R. Dragnes, jokka seisothaan podkasti Quæncastin takana.

Foto: Monica Milch Gebhardt

Perjantaina saađhaan kans lastentaraslapset olla myötä, ko kirjailiija Agnes Eriksen pittää heile muistelushetken Vesisaaren museumissa. Hän oon muun muassa tunnettu hänen Kummitus ja Tähtipoika kirjasarjasta, ja oon voittanu Kieliraatin kväänin kielipalkinon.

Lisäksi perjantaina UiT Norges arktiske universitet:in professori Trine Kvidal-Røvik pittää faakimuisteluksen prosjektista IMMKven, ja duo Beddari-Nilsen järjestää konsertin. Duossa oon myötä Trygve Beddari ja Anne Margaret Nilsen, molemat hyvin tunnettui kväänin ja norjansuomalaisessa miljöössä.

– Perjantai ilta päättyy ensimäisheen «QvænClubhiin». Silloin met freistaama saađa aikhaan kunnolisen "clubitunnelman". Kaksi henkkee, jokka oon ennen työtely Raatio Pohjaisenorjassa programijohtaajiinna, tullee soittamhaan musikkii, paljastaa Olufsen.

Trygve Beddari og Anne-Margaret Nilsen

Trygve Beddari ja Anne-Margaret Nilsen tunnethaan kväänimiljöössä muun muassa heiđän musikkiesityksestä Merenneiđon helmet ja Nordens krokodille.

Foto: Pål Vegard Eriksen / Halti kvenkultursenter

Festivaalipyhä oon kans täynä tekemistä. Yhtheistyössä Vesisaaren histoorialaakin kans meinaa professori Einar Niemi lähteet taas pienen joukon kans taipalelle, tällä kerttaa Salttijärvheen og Kullanelvhaan. Kaupungissa pyblikymi päässee taas tutustumhaan tekhoon, ko Helga Vara järjestää sauma- ja vaatepajan.

Kväänilauluroikka KvääniÄänii oon kans myötä fästissä. Ensin het järjestethään musikkiseminaarin ja hiljemin illala kirkkokonsertin yhđessä Vesisaaren kirkkolauluroikan kans.

Einar Niemi guider på byvandring i Indrebyen i Vadsø under Kvenske dager sept. 2020

Vuona 2020 Einar Niemi oli taipalella pienen joukon kans Vesisaaren Sisäpäässä.

Foto: Laila Lanes / NRK

Festivaali päättyy museumisunnuntaihin. Vadsø museum - Ruija kvenmuseum meinaa pittäät ovensa auki, ja tarjoo monenmuista programii niin lapsile ette raavhaile. Duoen Beddari - Nilsen pittää muun muassa lapsikonsertin, ja kirjailiija Åshild Karlstrøm Rundhaug tullee esitelemhään hänen kirjansa «Baketradisjona i Kvenland».

Festivaalijohtaaja Olufsen toivottellee kaikki myötä vuođen ensimäisheen kväänifestivaalhiin.

– Ei sitä tarvitte eđes hunteerata. Se oon vain tulla myötä. Mie olen tilanu hyvän sään ja mie uskon, ette kaikki tulhaan nauttimhaan meiđän festivaalista.