Sidan like etter krigen har det vore mogleg å søkje skatteamnesti for skjulte formuar i utlandet, men det er fyrst dei siste åra at mange har kome springande med ekstra kroner til sjølvmeldinga.
– Omfanget har vore enormt stort. Det starta hausten 2007, etter Ditlev-Simonsen-saka i Oslo. I toppåret 2009 fekk vi inn 250 saker, dei to siste åra har vi fått inn 100 saker i året, seier avdelingsdirektør for skattekrim i Skatt Øst, Jan-Egil Kristiansen.
Han ser at dei stadig får inn nye saker, og at dei truleg berre har sett ein liten del av pengane som er gøymd i utlandet.
60-åringar frå Oslo, Asker og Bærum
På landsbasis er det om lag 800 som har meldt frå om ekstra formuar dei siste åra. Storparten av desse held til i området til Skatt Øst. Her har dei fått meldt inn om lag 600 saker, og har så langt behandla 349 av dei.
– Talet på saker og beløpa som har kome inn har vore formidabelt store. Det er langt over det vi kunne førestelt oss. Så langt så har klarlagt over 16 milliardar kroner, seier Kristiansen.
Han fortel at storparten av dei som melder frå kjem frå Oslo eller Asker og Bærum. Dei har ein gjennomsnittsalder på vel 64 år og har gjerne gøymd pengane i Sveits eller Luxembourg.
– Litt overraskande er det at 40 prosent av dei som melder frå er kvinner. Noko av forklaringa er at det er ein del enker som har arva pengar etter sine menn.
Slepp ekstraskatt
Jan-Egil Kristiansen tror mange nordmenn har store skjulte formuer i utlandet.
Foto: Holm, Morten / SCANPIXHan trur årsaka til at så mange melder frå er at dei slepp både straff og tilleggsskatt, samtidig som risikoen for å bli oppdaga har auka.
– Vi har fått nye avtaler og slike saker blir høgare prioritert frå skattevesenet. Eg trur folk er redde, og undersøkingar viser at frykta for å bli teke er utslagsgjevande.
Han fortel om dei får oppgjeve beløp frå 100-millionarsklassa ned til nokre titusen kroner.
– Dei ringjer ofte på førehand, anten sjølve eller gjennom sin advokat. Dei loddar stemninga og forsikrar seg nøye om det som skjer. Dei er nok litt overraska over at dei slepp unna tilleggsskatt og politimelding dersom dei kjem friviljug, seier Jan-Egil Kristiansen i Skatt Øst.
