– Det er god stemning i jaktlaget når alt verkar og vi får felt dyret. Vi er jo berre sett til å gjere ei oppgåve frå staten.
Det seier fellingsleiar Tord Strand til NRK etter at ein hannbjørn på 165 kilo vart skoten i Stor-Elvdal onsdag formiddag klokka 10:30.
Klokka 02:00 natt til onsdag fekk jaktlaget bilete på viltkameraet sitt i eit område dei visste at bjørnen hadde for vane å kome.
Da sette dei seks i jaktlaget i gang jakta på bjørnen, og etter fleire timar med intens jakt for både jegerar og hund vart bjørnen skoten på post.
– Bjørnen vart skoten med to skot for sikkerheits skuld, seier Strand.
Det var Østlendingen som omtalte fellinga fyrst.
Auke i bestanden
Tal frå rovdata viser at bjørnebestanden i Noreg auka med 10 prosent i 2018. Men framleis ligg ein godt under bestandsmålet på 13 bjørnekull i året.
Jonas Kindberg i Rovdata seier at berekningar dei har gjort viser at det vart født åtte bjørnekull i 2018.
Bjørnen som vart skoten i Stor-Elvdal onsdag er den andre på få dagar i Noreg. Måndag vart ein ung hannbjørn skoten i Trøndelag.
Kindberg meiner likevel at det ikkje har noko å seie for at ein skal kunne nå bestandsmåla.
– Yngre hannbjørnar flytter seg over store område, og har mindre betydning for vekst i bestanden. Det er binnene som er viktig for reproduksjon.
– Men det er bra om eldre hannbjørnar kan få stabilisere seg i visse område.
Færre tap på beite
Lars Gangås er seniorrådgjevar i Statens naturoppsyn og fellingsleiar i Sør-Noreg.
Han fortel at det verkar å vere rolegare på beite i år samanlikna med 2018.
– Vi var tidleg ute med å felle tre ulvar før dei rakk å gjere skade i vår, så det er kanskje derfor det er rolegare, seier Gangås.
Men han seier at det framleis er for tidleg å seie korleis denne beitesesongen blir.
– Det er meir tilfeldig med ulv, fordi dei vandrar mykje. Når det gjeld bjørn plar dei å bli meir aktive seinare i beitesesongen, seier Gangås.
Dokumenterte sauetap
Bjørnen i Stor-Elvdal vart skoten fordi at det den 29. juni vart dokumentert at ei søye hadde blitt skada av bjørnen ved Gåla seter i Stor-Elvdal.
Ei veke seinare hadde han forsynt seg med nok ei søye i Samdalen i nabokommunen Ringebu.
Dette fekk Fylkesmannen i Innlandet til å gje fellingsløyve på bjørnen den 10. juli.
Fellingsleiar i Stor-Elvdal Tord Strand fortel at det ikkje skal vere mistanke om at fleire bjørnar gjer skade i området no.
Kadaveret av bjørnen er no seld til Finnskogen villmarkssenter, mens skinn og hovudet skal sendast til miljøverndirektoratet.