17-årig helt då Molde knuste veslebror

Molde knuste Aalesund i fylkeskampen i Møre og Romsdal. 5-1 vart det søndag, og dagens helt var 17 år gamle Sander Svendsen . Han scora både det første og det tredje målet – det er dobbelt så mange som han scora i fjor. Molde utklassa fylkesnaboen frå A til Å i denne kampen, og Aalesund har 11 baklengsmål på dei tre første kampane.

Odd åleine på toppen

Odd innleia sesongen med siger i Molde, og etter tre rundar er Dag-Eilev Fagermos mannskap det einaste laget med full pott. Søndag blei det 4-2 over Glimt på Aspmyra, sjølv med fire faste ute av laget. Men 41 år gamle Frode Johnsen var med, og han kom på scoringslista igjen. Odd reiste tydeleg nordover for å satse offensivt. – Vi spela ein god bortekamp, og det er nydeleg å toppe serien , slo Fagermo fast. I botnen er Glimt like aleine, og er einaste laget utan poeng.

Sandefjords friske start

Lars Bohinens Sandefjord var massivt nedrykkstippa før sesongen, men har vunne to av tre kampar så langt. Mot Sarpsborg var dei klart best, litt hjelpt av Sarpsborgs raude kort tidleg i andre omgang.

Kneskaden som kan øydelegge heile sesongen

Mjøndalen er framleis utan tap, men gleda over 1-1 mot Start var blanda med ein kraftig dose malurt: Vamouti Diomandes kneskade var vond å sjå på. Klubbprofilen braut kneskåla tvert av. Kampen måtte stoppast i åtte-ni minutt medan den uheldige spelaren fekk behandling, og det gjorde vondt å sjå tv-bileta frå hendinga. – Det er utruleg trist, først og fremst for han sjølv. Han er lei seg for å kanskje miste heile sesongen. Men det er heldigvis ikkje fare for karrieren , seier Mjøndalens trenar Vegard Hansen.

Godset avslørte Rosenborg

Rosenborg var fulle av sjølvtillit med 11-0 på to kampar. Men Strømsgodset kom til Lerkendal og fekk trønderane brutalt ned på jorda igjen. Godset pressa i lange periodar Rosenborg bakover, og RBKs tidlege leiarmål var også klart offside. Godsets veteran Peter Kovacs lurte RBK-forsvaret på ein rutinert måte og sikra 1-1– Vi kom for å stilne publikum, og det greidde vi, sa Godset trenar David Nielsen. Nesten 20.000 på tribunene likte neppe det dei såg.

Brown-dobbel

Vålerengas jamaicanske erstattar for Vidar Ørn Kjartansson fekk det ikkje til i dei første kampane, men denne gongen viste han kva vi kan vente. To mål med berre sekunds mellomrom var nok til at Vålerenga slo Haugesund 2-0 og er med i toppkampen. – Eg var vel ikkje helten i dag, men eg håpar å bli det, sa han beskjedent etter kampen.