- Dette er islamisering

Innvandrarpolitisk talsmann i Frp, Per-Willy Amundsen, reagerer sterkt på at ein skule i Tromsø med over 300 elevar har innført separat gym- og symjeundervising for gutar og jenter på grunn av éin muslimsk elev.

• LES OGSÅ: Måtte innføre kjønnsdelte gymtimer

– Dette er ein del av det Frp kallar «islamisering». Noreg tilpasser seg innvandrarar istaden for at innvandrarar tilpassar seg Noreg, seier Amundsen som er stortingsrepresentant for Troms.

– Ikkje lovstridig

Amundsen meiner også det er grunn til å stille spørsmål ved om ei slik form for kjønnsdelt undervisning er lovleg.

• LES OGSÅ: Kritisk til religiøse fritak i skolen

I opplæringslova heiter det at organiseringa av undervisninga «ikkje skal skje etter fagleg nivå, kjønn eller etnisk tilhør».

Men ifølgje statssekretær i Kunnskapsdepartementet, Roger Østlie Sandum, er ikkje praksisen ved Borgtun skule lovstridig.

– Kjønnsdelt undervisning er som hovudregel korkje ønskeleg eller tillate, men her vert omsynet til elevane si deltaking viktigare enn det rettslege prinsippet, seier Sandum.

Kjønnsdelt i ti år

Statssekretæren viser til at Kunnskapsdepartementet også i tidlegare saker har tolka lova på denne måten. Ved Møllergata skole i Oslo har til dømes gutar og jenter hatt separat symjeundervising i ti år av omsyn til muslimske elevar.

• LES OGSÅ: Kjønnsdelt svømmeopplæring i Oslo

– Skulane skal strekkje seg langt for å få til felles undervising, og forsøke å løyse problemet i dialog med foreldra til ungane, seier Sandum

– Men symjing er spesielt. Kjønnsdelt matteundervising hadde til dømes heilt klart vore i strid med opplæringslova, legg han til.

• LES OGSÅ: Svømmeforbundet: Det viktigste er at barn lærer å svømme

– Uforståeleg

Amundsen i Frp meiner likevel det er heilt uforståeleg at Borgtun skule har vald å tilpassa undervisinga av omsyn til èin elev sin religiøse bakgrunn.

– Me har ein skule som skal ha eit læringsopplegg som er likt for alle. Då er det spesielt at denne skulen er så villig til å gje etter i forhold til muslimar sine ønsker og krav.

NRK har førebels ikkje lukkast i å få ein kommentar frå leiinga ved Borgtun skule i Tromsø.

• LES OGSÅ: Vil innføre nasjonale svømmetester