- Bussjåføren hindra ei enda større ulykke

Det var like etter klokka 16 fredag ettermiddag at ein bil og ein buss kolliderte på riksveg 15 aust for Grotli i Skjåk kommune.

I personbilen var det fire personar, to av desse mista livet medan to er alvorleg skadd. Dei to skadde vart frakta til sjukehus i Trondheim for vidare behandling.

Ingen av busspassasjerane fekk fysiske skader etter ulykka.

• - Vart møtt av eit forferdeleg syn

Rosar bussjåføren

– Alle eg har prata med rosar sjåføren for måten han fekk den ned i vegskråninga på utan at den velta, seier ordførar i Skjåk, Rolv Kristen Øygard.

Han er sikker på at ulykka kunne vorte langt meir alvorleg dersom ikkje bussjåføren hadde handla som han gjorde.

– Da eg såg korleis bussen stod i skråninga så tenkte eg at det var ei lykke at den ikkje hadde velta. Mykje tydar på at dette kunne gått langt verre, seier Øygard.

Fekk hjelp av kriseteam

Det kommunale kriseteamet, med prest og lege inkludert, vart raskt utkalla til staden.

– Det er klart at det er mange som har mykje tankar i hovudet, og det er mange som er prega av det som har skjedd.

Han fortel at kommunen og Grotli høgfjellshotell har fått ros for måten dei tok seg av dei 22 busspassasjerane på.

– Kriseteamet vårt har dessverre vore litt for ofte i sving i det siste, det har vore mange alvorlege ulykker. Men dei gjer ein fabelaktig jobb, seier Skjåk-ordførar Rolv Kristen Øygard.

Ein ny buss kom fredag kveld til Grotli for å frakte busspassasjerane vidare over fjellet.