Cupfinalehelten har kjempa seg til startplass

Dårlege nyheiter for Molde, men då Espen Bugge Pettersen blei skadd i andre serierunde var det på éin måte gode nyheiter for to reservekeeperar.

Bugge Pettersen, som blei 33 år på fredag, måtte ut med ein hamstringskade mot Lillestrøm 2. april.

– Vi har to gode keeperar. Både Ole Söderberg og Ørjan (Håskjold Nyland, journ.anm.), så det er ingen problem for oss, sa keepertrenar Mark Dempsey dagen etter.

Svenske Söderberg (22) fekk tillit i resten av Lillestrøm-kampen. Det same fekk han i dei fire påfølgjande serierundane.

• Les: Unge reservar klar i Bugge-fråvær

Skifte etter cupkamp

I NM har derimot Ørjan Håskjold Nyland vakta Molde-buret. Først mot Elnesvågen i første runde, før 22-åringen sin andre obligatoriske kamp gjekk mot Byåsen.

Etter 5-1-sigeren i Trøndelag fekk den tidlegare Hødd-keeperen fornya tillit, då Molde spelte bortekamp mot Start.

Der blei det årets andre poeng for fjorårets seriemeister med 1-1. I lokaloppgjeret mot Aalesund fekk Nyland endå ein gong tillit – i ein kamp som til slutt enda med 4-1 og årets første Molde-siger i serien.

• Sjå Eliteserietabellen her

– Kjekt å vite at han Ole Gunnar har trua

På spørsmål om han no er etablert som førstekeeper er Nyland roleg.

– Det tenkjer eg ikkje så veldig mykje på. Eg har stått to kampar, og det er kjekt å vite at han Ole Gunnar og dei har trua på meg. Så det er berre å jobbe hardt vidare og køyre på, seier keeperen til NRK.

– Har du tatt førstekeeperplassen raskare enn trudd?

– Det kan du seie. Altså, eg gjekk til laget som har vunne gull to år på rad, og her er mange gode keeperar.

• Les også: – Kan bli Noreg sin nye storkeeper
• Les også: Nyland: – For mi utvikling er eg sikker på at Molde er det rette valet

Førsteval?

For Nyland vil ikkje gi seg sjølv nokon stor merkelapp.

– Noko førsteval vil eg ikkje kalle meg enno. Eg har fått stå i to seriekampar og det er kjekt, slår 22-åringen fast.

Så langt har ikkje Molde tapt ein obligatorisk kamp med Nyland lengst bak.

No står det igjen å sjå om Söderberg igjen kan erobre keeperplassen og ikkje minst om Bugge Pettersen tek keeperplassen tilbake med éin gong han er skadefri.

I kveld ventar Sandnes Ulf borte for Molde, der det meste tydar på ny Nyland-kamp.

• Følg: Slik var Sandnes Ulf - Molde

Kven trur og meiner du skal vere Molde sin førstekeeper resten av 2013-sesongen? Sei meininga di i kommentarfeltet under.