– Heile verda gjer oss til latter

Denne veka blei norsktentamen ved ungdomsskulane i Ålesund flytta. Årsaka var at Justin Bieber skal halde konsertar i Oslo same dag som den opphavlege tentamensdatoen. Det blir ikkje godt motteke av lokalpolitikarane i Ålesund.

– Eg er veldig kritisk til det, seier Kristin Tørrisen, fylkesformann i Framstegspartiet Ungdom i Møre og Romsdal.

Tørrisen sit i bystyret og i komite for Kultur og oppvekst i Ålesund kommune. Ho meiner det er feil at skulane føyer seg på grunn av Bieber-konsert.

– Det sender uheldige signal til elevane. Er det tentamen som er viktigast eller Justin Bieber-konsert, spør Tørrisen.

LES OGSÅ: "Beliebers" mobbar og hetsar kvarandre

– Eg synest det er veldig uheldig at man vel å gi etter for elevane og ta lettaste motstands veg, seier Tørrisen.

Forsinka aprilsnarr

Då stortingsrepresentant Harald Nesvik (Frp), såg oppslaget i media trudde han at nokon hadde bomma på datoen for aprilsnarr.

– Eg tenkte at 1. april var jo på måndag, og ikkje på tysdag. Eg blir heilt oppgitt. Dette gir ein signaleffekt opp i mot skulevesen og elevane om kva som er viktig, seier Nesvik.

– Det ein seier her er at denne gutungen sin konsert i Oslo skal altså vere tentamen. Dette er rett og slett heilt meiningslaust, legg han til.

Latterleg flaut

Media har tatt tak i saken, og til og med USA med CNN har fatta interesse for ungdomsskulane i Ålesund si avgjer.

– Dette går ikkje an. No ser vi at heile verda gjer oss til latter, seier Nesvik.

LES OGSÅ: CNN ler av Bieber-fans frå Ålesund

Nesvik forventar at det blir ei opprydding i kommuneadministrasjonen og at ordføraren i Ålesund tar ein prat med skulane.

– Skulane har drite seg ut. Det er alvorleg. Dette må vere eit eingongstilfelle, avsluttar Nesvik.

Forståing

Både Tørrisen og Nesvik har full forståing for at tenåringane vil oppleve ein konsert med idolet sitt.

– Eg skjønner at Justin Bieber er eit tenåringsidol, men ein må spørje seg sjølv kva som er viktigast, og om dette skal bli praksis for andre store konsertar og andre fritidsaktivitetar, seier Tørrisen kritisk.

Dei meiner begge to at no er det ikkje så mykje å gjere med denne saka, fordi tentamen allereie er flytta og elevane har kjøpt billettar og byrja å glede seg.

– Men dei kan ikkje gi like lett etter for presset neste gong, avsluttar Tørrisen.