Facebook-grunnleggar Mark Zuckerberg.
Foto: Paul Sakuma / Ap/ NTB ScanpixI dag la det største sosiale nettverksselskapet i verda, Facebook, fram dei første tala sidan det vart børsnotert i mai i år.
Selskapet rapporterer om eit tap på 157 millionar dollar, eller om lag 945 millionar norske kroner i andre kvartal, etter å ha skaffa seg inntekter på 240 millionar dollar.
Trass i at tala ikkje er overraskande, fell aksjen med nesten ti prosent i den elektroniske etterhandelen.
Besøkstala i vêret
Selskapet håva inn 992 millionar dollar i annonseinntekter og 192 millionar i andre inntekter - også i tråd med forventningane. Det svarar til ein inntekstvekst på 32 prosent.
Likevel sit selskapet igjen med eit underskot, fordi utgiftene veks i eit langt raskare tempo enn inntektene.
Men når det gjeld brukarar av nettsamfunnet, peikar tala i positiv retning. Minst 955 millionar var innom minst kvar månad. 553 millionar besøkte Facebook dagleg. Det er ein vekst på ca. 30 prosent frå same periode i fjor.
Mobiltala har Mark Zuckerberg enda større grunn til å jubla over. Facebook hadde der ein auke på 67 prosent aktive brukarar frå 2011 til 2012.
Trøblete børs-start
Forventningane har vore skyhøge for Facebook, som før børsdebuten vart anslått til ein verdi på opp mot 560 milliardar kroner. Det fekk mange analytikarar til å reagera.
– Dette kan bli ei boble, åtvara Tor W. Andreassen, professor i marknadsføring ved BI, i februar i år.
Les meir:
Likevel kunne Facebook-grunnleggar Mark Zuckerberg spretta champagnen 18. mai i år, då selskapet vart børsnotert.
I løpet av det første halve minuttet vart heile 82 millionar aksjar selde for 42,05 dollar aksjen, noko som gav Facebook beste børsnotering blant IT-selskapa gjennom tidene.
Les meir:
Etter det har det gått nedover med selskapet. Facebook har fått ei rekke søksmål retta mot seg, mellom anna for å ha å kutta inntektsprognosane for å blåsa opp prisen på aksjane.
Facebook har dessutan hatt problem med å få inntekter frå dei som bruker tenesta på mobiltelefon.
Les meir:
