Etter å ha søkt om støtte i tre år bestemte regissør Johan Kaos seg for å blåse i å få pengar frå Norsk Filminstitutt. Saman med produsent Ravn Wikhaug gjekk han rett til publikum for å be om pengar.
Og det viste seg å vere mange som ønskte å sjå boksuksessen «Pornopung» omgjort til film. Såkalla publikumsfinansiering betyr at kven som helst kan betale litt av det filmen kostar å produsere.
300.000 frå publikum
– Publikumsfinansieringa vil vere veldig sentral. Dette er eit budsjett som er ganske stramt uansett, og dei siste 300.000 kronene som publikum kjem med er heilt essensielle, seier produsent Ravn Wikhaug.
Mesteparten av desse pengane skal bli brukt til etterarbeid med filmen.
Trass mange avslag frå filminstituttet er filmen no under innspeling i ein feststemt Frogner-villa. «Pornopung» blir den første norske filmen som tar i bruk publikumsfinansiering og handlar om tre livsnytande, jentegalne gutar i eit kollektiv.
LES:
Kronerulling, eller «crowdfunding» som det heiter på engelsk, har blitt eit verdsfenomen. Eit av dei første prosjekta kom i 1997, då fansen til metalbandet Marillion samla inn 60.000 dollar til bandet. ArtistShare dukka opp på starten av 2000-talet som den første nettstaden for publikumsfinansiering, og i dag fins det mange slike nettstadar, blant anna norske NewJelly.
– Det var Ravn, produsenten, som sa det så fint, at vi er for unge og naive til å vente, seier Ole Christoffer Ertvåg, som spelar hovedpersonen Christian.
(Artikkelen held fram under biletet)
Får ikkje ta ut overskot
Dersom du spyttar inn pengar får du din bit av filmen på DVD, du kan vere med på interne tilstelningar, bli statist og hamne på rulleteksten. For 250 kroner blir eitt sekund av filmen dedikert deg. Men du får ikkje pengar igjen om filmen går godt på kino.
– Du kjøper eit gode og er medverkande til finansieringa, så du kan få til dømes ein DVD, eit manus eller ein festpremiere, seier Wikhaug.
Beløpa varierer frå 100 kroner til 5000 kroner. Betalar du topp-prisen får du ein ekstragevinst – du blir kreditert som assosiert produsent.
LES:
Makt over kinoprogrammet
Camilla Jerven Glaister er ein av dei som har latt seg freista av dette.
– Eg har lyst til å støtte opp under unge, friske, inspirerte menneske, seier ho.
For mange er det moglegheita til å påverke kva filmar som blir laga, og dermed kjem på norske kinoar, som er inspirerande.
LES OGSÅ:
– Eg bestemmer litt kva som skal ut på marknaden og får lov til å delta, og det er det viktigaste. Eg får meir kontroll, meiner Anna Alekseeva, statist og publikumsinvestor.
«Pornopung», skrive av forfattar Mads Larsen, skapte mykje debatt då den kom ut i 2003, mykje på grunn av hovedpersonens utsvevande sexliv.
Totalbudsjettet er på 8.2 millionar kroner og filmen har premiere i august 2013.