Vi ♥ jakt
Dei lever og andar for denne årstida. Kva er magien med haustjakta?
Adina Sitje (20):
Årets elgjakt er Adinas aller første. Den starta med eit smell.
Ho hadde sete på post ein time. Plutseleg kom ei ung kvige tassande på myra.
– Den stoppa ti meter frå meg. Perfekt skothald.
Adrenalinet pumpa i blodet. Tankane rasa.
– Er det riktig dyr? Kjem eg til å treffe?
Det vart fulltreffar.
– Karane i jaktlaget var veldig glade på mine vegner. Ei heilt rå oppleving.
Hans Eivind
Ormestøyl (61):
Hans Eivind har vore i same jaktlag i 45 år. No bur han langt unna, og må køyre over 30 mil for å vere med.
– Kjerringa er snill og let meg dra, sjølv om eg er borte mange dagar i strekk. Ho veit at dette er den einaste hobbyen eg har.
Jakta er sjølvsagt spennande, men det aller viktigaste er å møte gamle kompisar.
– Og så er det triveleg å kome heim til mora og broren min.
Toini Thorsdal (49):
– Vi har ei eiga tidsrekning i bygda. Det er før og etter jakta.
Det byggjer seg opp store forventningar når hausten nærmar seg.
Sjølv om Toini har jakta i over 20 år, kom ei av dei største opplevingane i fjor.
Ho sat på post ved eit vatn og såg ei elgkvige som la på svøm.
– Eg gjekk i den retninga der ho ville kome i land.
Men elgen snudde og svømde mot posten hennar. Ho sprang attende for å vere på plass når kviga kom fram.
– Eg var der i tide og fekk skote dyret. Dette er berre ei av mange historier. Inga oppleving er lik.
Svein Arild Straume (24):
Denne karen har vore på jakt sidan han var tre år gamal.
Dei første minna er frå harejakta.
– Eg sat på ein stubbe og knaska smågodt, medan pappa fyra bål og lytta etter losen.
No jaktar han ti månader i året.
– Rev, gås, rein, hjort, hare og bever, for å nemne noko.
Svein Arild likar aller best å jakte med hund.
– For meg er det jakta sitt svar på Formel 1.
Samarbeidet med bikkjene betyr mykje. Naturopplevinga heng også høgt.
– Eg likar å kome tett på ville dyr, seier Svein Arild, medan hundane dreg i bandet.
Dei har fått los på eit rådyr.